Բոլորը վաղուց գիտեին ադրբեջանական լոբբիի մեթոդների մասին։ NEWS.am-ի թղթակցի հետ զրույցում նման կարծիք հայտնեց «Ծառուկյան» դաշինքի պատգամավոր, ԱԺ եվրաինտեգրման մշտական հանձնաժողովի նախագահ Նաիրա Զոհրաբյանը՝ մեկնաբանելով փողեր լվանալու եւ եվրոպացի դիվանագետներին կաշառելու հետ կապված Ադրբեջանի շուրջ բարձրացած սկանդալը։
Զոհրաբյանի խոսքով՝ տարիներ շարունակ Բաքուն ակտիվորեն կաշառել է եվրոպացի այս կամ այն գործչին՝ նման կերպ իր շահերն առաջ տանելով։ «Արեւմտյան հեղինակավոր լրատվամիջոցների վերջին սկանդալային բացահայտումները միայն ջրի երես հանեցին տվյալ գործունեությունը, որն այդքան ակտիվորեն վարում էր Ադրբեջանը։ Եվ այդ մասին լռել արդեն հնարավոր չէր»,-հավելեց պատգամավորը։
Զոհրաբյանը նշեց, որ հայկական կողմն անհերքելի ապացույցներ ունի, որ Ադրբեջանը փաստացի կաշառել է Հունգարիայի իշխանություններին, եւ նրանք էլ առանց խղճի խայթի Բաքվին են հանձնել հայ սպային սպանած Ռամիլ Սաֆարովին։ «Նրանք Սաֆարովին 7 մլն դոլարով Ադրբեջանին վաճառեցին։ Նախօրեին Եվրախորհրդարանը տվյալ աննախադեպ սկանդալը պատասխանատու կերպով հետաքննելու որոշում կայացրեց»,-եզրափակեց Նաիրա Զոհրաբյանը։
Հիշեցնենք, որ Guardian-ի տվյալներով՝ Ադրբեջանի իշխող վերնախավը ավելի քան 16 հազար վճարումներ է իրականացրել 2012-2014 թթ։ Այդ գումարների որոշ մասը վճարվել է քաղաքական գործիչների ու լրագրողների՝ Ադրբեջանի իշխանությունների հասցեին քննադատությունները նվազեցնելու ու երկրի համար դրական վարկանիշ ստեղծելու համար։
Ըստ պարբերականի՝ Ադրբեջանի իշխանությունները գաղտնի սխեմայի միջոցով 2․9 մլրդ դոլար են «լվացել» բրիտանական կեղծ ընկերությունների միջոցով։ Բանկային փաստաթղթերը փոխանցվել են դանիական Berlingske թերթին, OCCRP կազմակերպությանը, Guardian –ին։