Հայաստանի եւ Ադրբեջանի նախագահների հերթական հանդիպումը տեղի կունենա հոկտեմբերի 16-ին: Սերժ Սարգսյանն ու Իլհամ Ալիեւը ԵԱՀԿ ՄԽ համանախագահ երկրների նախաձեռնությամբ կհանդիպեն Ժնեւում: Նշենք, որ Ադրբեջանի նախագահն օրերս կրկին խոսել էր ղարաբաղյան հակամարտության մասին՝ հայտարարելով, թե բանակցային գործընթացը վերսկսվում է «առանց որեւէ նախապայմանի»: Նա հավելել էր, թե մինչեւ հիմա «Հայաստանը տարբեր տեսակի նախապայմաններ առաջ քաշելով՝ ցանկանում էր խափանել բանակցությունների վերսկսումը»:
Հայաստանի նախագահի աշխատակազմն Ալիեւի հայտարարությունը սադրանք էր որակել՝ նշելով, որ «մեզ հունից հանելու փորձերը ի սկզբանե ձախողված են. մենք հանձնառու ենք ղարաբաղյան հիմնախնդիրը կարգավորել բացառապես խաղաղ միջոցներով»: Սարգսյան-Ալիեւ վերջին հանդիպումը կայացել է 2016 թվականի հունիսի 20-ին Սանկտ Պետերբուրգում, ՌԴ նախագահի մասնակցությամբ: Իսկ 2016-ի մայիսին նրանք հանդիպել էին Վիեննայում՝ Ջոն Քերիի, Սերգեյ Լավրովի եւ Արլեմ Դեզիրի մասնակցությամբ: Այդ հանդիպումների ընթացքում նախագահները մի շարք պայմանավորվածություններ են ձեռք բերել: Ադրբեջանական կողմը, սակայն, մինչեւ հիմա հրաժարվում է կատարել Վիեննայի եւ Սանկտ Պետերբուրգի համաձայնությունները:
Վանաձորում հերթական ողբերգական դեպքն է տեղի ունեցել. հոկտեմբերի 12-ի երեկոյան տանը մենակ քնած 4-ամյա երեխան հրդեհի հետեւանքով մահացել է: Նախնական տվյալներով՝ հրդեհն առաջացել է հոսանքով տաքացվող ներքնակի բռնկվելու հետեւանքով: Երեխայի մայրը՝ Նաիրա Կարապետյանը, 5 երեխա ունի: Նրանցից երկուսը երկար ժամանակ է՝ սկեսրոջ խնամքին են, ավագ տղան Երեւանում է աշխատում: Նաիրան խնամում էր մահացած փոքրիկին եւ 7-րդ դասարանում սովորող տղային: Կարապետյանի ամուսինն ազատազրկման է դատապարտված: Վանաձորի շուկայում հավաքարարությամբ ու բեռներ փոխադրելով օրվա հաց վաստակող Նաիրան տարիներ առաջ քաղաքի խնամակալության հանձնաժողովի ներկայացուցիչներին վստահեցրել է, որ իր երեխային պահելու համար դայակ է վարձել: Որպես դայակ ներկայացած կինը նույնպես հավատացրել է, որ զբաղվում է փոքրիկի խնամքով: Սակայն հանձնաժողովի անդամներն այս ընթացքում տնային այց չեն կատարել եւ չեն ստուգել նրանց խոսքերի իսկությունը, ինչն էլ ողբերգական հետեւանքներ է ունեցել: Դեպքի առիթով քրեական գործ է հարուցվել:
«Զինված խմբի» գործով դատական նիստն այսօր նույնպես հետաձգվել է: Պաշտպանության նախկին փոխնախարար Վահան Շիրխանյանի ինքնազգացողությունը կրկին վատ է եղել. մեկ ժամ ուշացումով նիստի մեկնարկից անմիջապես հետո Շիրխանյանը հայտարարել է, որ «Դատապարտյալների հիվանդանոց» ՔԿՀ-ից դատարան տեղափոխելիս ուղեկցող խումբն աստճաններին երկու անգամ գցել է իրեն, ինչից հետո մեջքի շրջանում սուր ցավեր են առաջացել:
Դատարան ժամանած շտապօգնության բժիշկները հետազոտել են նրան եւ խորհուրդ չեն տվել, որպեսզի նա մասնակցի դատական նիստին: Դատարանը որոշում է կայացրել Շիրխանյանին հիվանդանոց տեղափոխել՝ հետազոտության: Նշենք, որ գործով այսօրվա նիստին պետք է հետազոտվեին քրեական գործում առկա փաստաթղթերը:
Վրաստանում քաղաքական ճգնաժամ է հասունանում: Երկրի խորհրդարանը որոշել է շրջանցել Սահմանադրության փոփոխությունների վրա դրված նախագահի վետոն: Ի սկզբանե քվեարկության էր դրվել նախագահի առաջարկած սահմանադրական փոփոխությունների նախագիծը, որը խորհրդարանում մերժվել էր։ Հետո քվեարկության էր դրվել փոփոխությունների նախնական խմբագրությունը, որն ընդունվել էր ձայների մեծամասնությամբ: Փոփոխությունների նախագիծն արժանացել է նաեւ Վենետիկի հանձնաժողովի հավանությանը:
Նշենք, որ Գեորգի Մարգվելաշվիլին դեմ էր նախագահի ընտրության կարգը փոխելու՝ խորհրդարանի առաջարկին: Նախագծի համաձայն՝ Վրաստանը կառավարման կիսանախագահական կարգից անցում է կատարում խորհրդարանական կառավարման: Դա ենթադրում է նախագահի ուղղակի ընտրության չեղարկում եւ նրա լիազորությունների կրճատում, ինչին էլ դեմ էր Մարգվելաշվիլին: Մյուս խնդրահարույց կետը վերաբերում է բացառապես համամասնական ընտրակարգով խորհրդարանական ընտրություններ անցկացնելու ժամկետներին: Նախագահի առաջարկով՝ Սահմանադրության այս դրույթը հարկավոր է գործարկել 2020 թվականին՝ նախապես ծրագրված 2024 թվականի փոխարեն։
Իրաքի զորքերը Քիրքուքի գրավման գործողություն են սկսել: Միջազգային լրատվամիջոցները հաղորդում են, որ Իրաքի զինված ուժերն առաջ են շարժվում, որպեսզի գրավեն 2014 թվականի հունիսի իրադարձությունների ժամանակ կորցրած դիրքերը: Փեշմերգայի հրամանատարությունը հայտարարել է, որ անցած գիշեր Իրաքի զինվորականներն ու ռազմական կազմավորումները Քիրքուքի հարավից սկսել են առաջ շարժվել՝ հարձակման նպատակով: Քիրքուք փեշմերգայի հազարավոր զինյալներ են ուղարկվել:
Իրաքի վարչապետը, սակայն, հերքել է քրդական շրջանների վրա հարձակում նախապատրաստելու մասին լուրերը: Հայդեր ալ-Աբադին հայտարարել է, որ Բաղդադը բանակը երբեք չի օգտագործի ժողովրդի կամ քուրդ քաղաքացիների դեմ պատերազմի համար՝ հավելելով, որ իրենց պարտականությունն է պահպանել երկրի միասնությունն ու պաշտպանել քաղաքացիներին:
Քալիֆորնիայում անտառային հրդեհների զոհերի թիվը հասել է 31-ի: Հարյուրավոր մարդիկ անհետ կորած են համարվում: Հրշեջները շարունակում են պայքարել կրակի դեմ, որն արդեն 3500 շենք է ոչնչացրել: Սանտա Ռոզա քաղաքում մի քանի թաղամաս մոխրակույտի է վերածվել: Ավելի քան 25 հազար մարդ ստիպված է եղել լքել տները: Հյուսիսային Քալիֆորնիայում մոլեգնող անտառային հրդեհների պատճառները դեռեւս չեն պարզել:
Դոլարը շարունակում է ամրապնդել դիրքերը, իսկ եվրոն փոքր-ինչ թուլացել է: Հոկտեմբերի 13-ին դոլարի փոխարժեքը կազմել է 480 դրամ, եվրոյինը՝ 568, ռուբլունը՝ 8 դրամ 34 լումա, ֆունտինը՝ 638 դրամ:
Հոկտեմբերի 14-ին հանրապետությունում սպասվում է առանց տեղումների եղանակ: Հոկտեմբերի 16-ից օդի ջերմաստիճանը 3-4 աստիճանով կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +6+8, ցերեկը՝ +22+24 աստիճան տաքություն: