Նոյեմբերի 22-ին Թբիլիսիում հակակոռուպցիոն գործողության շրջանակում ձերբակալված տղամարդուն մեղադրանք է առաջադրվել Վրաստանի Քրեական օրենսգրքի 2 հոդվածով, հայտնում է «Грузия Online»-ը:
«Մեղադրանք է առաջադրվել արտասահմանյան ահաբեկչական կազմակերպությանն անդամակցելու եւ նրա ահաբեկչական գործունեությանն օգնություն ցույց տալու համար, ինչպես նաեւ ահաբեկչության նպատակով հրազեն, ռազմամթերք, պայթուցիկ նյութեր եւ պայթուցիկ սարքեր ապօրինի ձեռք բերելու, պահելու եւ կրելու համար»,- նշված է դատախազության հայտարարության մեջ: Այս մեղադրանքով նախատեսվում է 10-ից մինչեւ 17 տարվա ազատազրկում:
Ավելի վաղ ձերբակալվածի փաստաբան Իմեդա Կարկաշաձեն հայտնել էր, որ իր պաշտպանյալը ռուսական քաղաքացիություն ունի: Նրա տեղեկացմամբ՝ տղամարդն ավելի վաղ է ձերբակալվել, նախքան հատուկ գործողությունը սկսելը, ահաբեկչության հետ չկապված հոդվածներով: Կասկածյալի անունը չի հրապարակվում:
Չորեքշաբթի լույս գիշերը Թբիլիսիում ահաբեկիչների վնասազերծման գործողություն է սկսվել, որը գրեթե մեկ ամբողջ օր է տեւել: Նոյեմբերի 22-ի երեկոյան Վրաստանի Պետական անվտանգության ծառայությունը հայտարարել է հանցավոր խմբի անդամներից մեկին կալանավորելու եւ երեքին ոչնչացնելու մասին, որոնք Վրաստանի քաղաքացիներ չեն: Գործողության ընթացքում ուժայինների շրջանում մեկ աշխատակից զոհվել է, չորսը վիրավորվել: Ավելի ուշ երկրի ՆԳ նախարար Գեորգի Գախարիան հայտարարել է, որ խոսքը «միջազգային ահաբեկչության փաստին» է վերաբերում, եւ ըստ հատուկ գործողության քննություն է տարվում նաեւ ուրիշ երկրներում:
