Ժիրայր Սեֆիլյանի եւ մյուսների գործով դատական նիստին այսօր` հունվարի 12-ին, ամբաստանյալներից Հրայր Թոփչյանի պաշտպանը միջնորդությամբ հանդես եկավ: Գեորգի Մելիքյանը միջնորդեց, որպեսզի դատարան հարցաքննության համար հրավիրվի ՀՀ ոստիկանության ՓՔՎ փորձագետ Ռ. Պողոսյանը: Նա նաեւ միջնորդեց որպես վկա դատարանում հարցաքննել ՀՀ ոստիկանության Մաշտոցի բաժնի հետաքննիչ Ա. Տեր-Պողոսյանին:
Մեղադրողները պաշտպանի առաջին միջնորդությանը չառարկեցին, իսկ երկրորդին առարկեցին՝ նշելով, որ այն անհիմն է:
Դատարանը պաշտպանի առաջին միջնորդությունը՝ ՀՀ ոստիկանության ՓՔՎ փորձագետ Ռ. Պողոսյանին դատարան հրավիրելու եւ հարցաքննելու մասին բավարարեց, երկրորդ միջնորդությունը մերժեց:
Հաջորդ դատական նիստին դատարանում կհարցաքննվի փորձագետ Ռ. Պողոսյանը: Դատական նիստը հետաձգվեց մինչեւ հունվարի 19-ը:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում:
