News
Լրահոս
News
Երեքշաբթի
Դեկտեմբեր 11
Տեսնել լրահոսը


Տավուշի մարզի զորամասերից մեկում ժամկետային զինծառայողը հրազենային վիրավորում է ստացել: Պաշտպանության նախարարի մամուլի խոսնակի տեղեկացմամբ՝ նա վիրավորվել է երեկ: Արծրուն Հովհաննիսյանը, սակայն, չի մանրամասնել, թե ինչ հանգամանքներում է վիրավորվել զինվորը: Նրան Բերդի զինվորական հոսպիտալում վիրահատել են, հետո տեղափոխել Երեւան՝ կենտրոնական զինվորական հոսպիտալ: Զինծառայողի կյանքին վտանգ չի սպառնում:

Իշխող կոալիցիան կայացրեց որոշումը. Հայաստանի 4-րդ նախագահի պաշտոնում պաշտոնապես առաջադրելու են Արմեն Սարգսյանի թեկնածությունը: Խմբակցությունների հանդիպումից հետո Դաշնակցությունից Աղվան Վարդանյանը լրագրողներին ասել է, որ հիմա ՀՀԿ-ի նախագահի թեկնածուին առաջադրելու համար ստորագրություններ են հավաքում: Շուրջ 60 ստորագրություն արդեն հավաքվել է, թեեւ անհրաժեշտ է պատգամավորների ընդհանուր թվի մեկ քառորդի ստորագրությունը: Աղվան Վարդանյանը ճիշտ չի համարում նաեւ կարծիքները, որ Սահմանադրության փոփոխություններից հետո նախագահից այլեւս ոչինչ կախված չէ:

Ստորագրություններ է հավաքում նաեւ «Ելք»-ը. խմբակցությունն ուզում է Սահմանադրական դատարան դիմել՝ Հայաստանի 4-րդ նախագահի՝ Ազգային ժողովի կողմից ընտրությունը հակասահմանադրական ճանաչելու պահանջով:  ՍԴ դիմելու համար անհրաժեշտ է 20 պատգամավորի ստորագրություն, մինչդեռ «Ելք»-ը 9 պատգամավոր ունի: Խմբակցությունը դիմումի տեքստն ուղարկել է «Ծառուկյան» խմբակցությանը, սակայն այս խմբակցությունից Գեւորգ Պետրոսյանը նպատակահարմար չի համարում «Ելք»-ի նախաձեռնությանն իրենց միանալը: Նա նաեւ հորդորում է հարցը չդիտարկել զուտ քաղաքական համագործակցության համատեքստում:

Նիդեռլանդների խորհրդարանի Ստորին պալատի անդամները հավանություն են տվել Հայոց ցեղասպանությունը ճանաչող բանաձեւին: Երկրի արտգործնախարարի պաշտոնակատարը, սակայն, հայտարարել է, որ կառավարությունը չի հետեւի խորհրդարանի օրինակին. պաշտոնյայի խոսքով՝ կառավարությունը «շարունակելու է զսպվածություն ցուցաբերել»: Միաժամանակ, խորհրդարանականները որոշել են, որ կառավարության անդամներից մեկն ապրիլի 24-ին Երեւանում կմասնակցի Հայոց ցեղասպանության զոհերի հիշատակի միջոցառումներին:

Անկարայի արձագանքը չի ուշացել. այստեղ որոշումն «անհիմն» եւ «իրավական ուժ չունեցող» են որակել: Միաժամանակ, Թուրքիայի ԱԳՆ է կանչվել Նիդեռլանդների գործերի ժամանակավոր հավատարմատարը: Հոլանդացի պաշտոնյային կոչ են արել «վերանայել Թուրքիայի նկատմամբ իրենց չհիմնավորված վերաբերմունքը եւ չքաղաքականացնել պատմությունը»:

«Նորք» ինֆեկցիոն հիվանդանոցում 2 ամսական երեխա է մահացել. պատճառը «կապույտ հազն» է: Մահացած փոքրիկին ու ընտանիքի մյուս երկու երեխաներին ծնողները հրաժարվել են պատվաստել: Հիվանդությունը երեխայի մոտ սկսվել է շուրջ 1 ամիս առաջ, այս դեպքում էլ ծնողները չեն ցանկացել հոսպիտալացնել նրան՝ չնայած տարածքային պոլիկլինիկայի մանկաբույժի հորդորին: Պարզվել է, որ մահացած երեխան եւ նրա զույգ եղբայրը կապույտ հազով վարակվել են 2 տարեկան 9 ամսական քրոջից: Առողջապահության նախարարության տվյալներով՝ վերջին երկու ամիսներին Հայաստանում կապույտ եւ հարկապույտ հազով հիվանդացության դեպքերն ավելացել են: Այդ ընթացքում 12 դեպք է գրանցվել, իսկ նրանցից 8-ը չպատվաստված երեխաներ են:

Հերթական արտակարգ դեպքը Հրազդանի կիրճում: Կիեւյան կամրջի տակ՝ Հրազդան գետում դի են հայտնաբերել: Գետից դուրս են բերել 26-ամյա Վարդան Մնացականյանի դին. ոստիկանությունը նրան հունվարի 30-ից որոնում էր որպես անհետ կորած: Կատարվածի մանրամասներ առայժմ չեն հաղորդվում, հայտնի է միայն, որ արտաքին զննությամբ դիակի վրա բռնության հետքեր չեն հայտնաբերվել: Ըստ տեղեկությունների՝ երիտասարդը Երեւանի առեւտրի կենտրոններից մեկի անվտանգության աշխատակիցներից էր:

Եվս մեկ արտակարգ դեպք էլ տեղի է ունեցել Գյումրիում: Քաղաքի շենքերից մեկի 4-րդ հարկում փլուզում է եղել: Փրկարարները 11 բնակչի են տարհանել, այդ թվում՝ 2 երեխայի: Նրանց ժամանակավոր կացարան են տեղափոխել: Գյումրու քաղաքապետարանից տեղեկացրել են, որ շենքը վթարային էր եւ պետք է քանդվեր. 1988-ի երկրաշարժի ժամանակ էր վնասվել: Հիմա սեփականատիրոջ հետ քննարկում են քանդման աշխատանքները սկսելու հարցը: Վարդգես Սամսոնյանը նշել է նաեւ, որ բնակիչներին մի քանի անգամ առաջարկել են պետական ծրագրով լուծել նրանց բնակարանների հարցը, սակայն չեն ցանկացել հեռանալ այս շենքից:

Փետրվարի 23-ին դոլարն ու եվրոն սկսել են թանկանալ: Դոլարի փոխարժեքը կազմել է 480 դրամ, եվրոյինը՝ 591, ռուբլունը՝ 8 դրամ 52 լումա, ֆունտինը՝ 671 դրամ:

Փետրվարի 24-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի 0+2, ցերեկը՝ +14+16 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով»․ 11․12․2018
Լուսադեմին հրդեհ է բռնկվել Լոռու Ստեփանավան քաղաքի Աշոտաբերդ թաղամասի փայտյա տներից մեկում․․․
Օրվա գլխավոր լուրերը՝ «մեկ տողով». 10.12.2018
Ավարտվեցին Հայաստանի պատմության առաջին արտահերթ խորհրդարանական ընտրությունները...
Օրվա գլխավոր լուրերը՝ «մեկ տողով»․ 07․12․2018
Վերաքննիչ դատարանը Ռոբերտ Քոչարյանի խափանման միջոցի հարցը 5 օր քննելուց հետո այսօր վճռեց անփոփոխ թողնել առաջին ատյանի որոշումը․․․
Օրվա գլխավոր լուրերը՝ «մեկ տողով»․ 06․12․2018
Փաշինյանը համոզված է, որ ՀԱՊԿ-ը կարող է թույլ չտալ Լեռնային Ղարաբաղի խնդիրը զինված մեթոդով լուծելու Ադրբեջանի գայթակղությունը․․․
Օրվա գլխավոր լուրերը՝ «մեկ տողով»․ 05․12․2018
Շուտով Փաշինյանը մտավ ֆեյսբուքի ուղիղ եթեր, և բացատրեց, թե ինչու են հրապարակվում այդ նյութերը․․․
Օրվա գլխավոր լուրերը՝ «մեկ տողով»․ 04․12․2018
Այն մարդիկ, որոնք հայտարարում են, թե հեղափոխությունը Արցախի դեմ դավադրության ծրագիր է, դավաճանության մեղադրանք են ներկայացնում․․․
Ամենաշատ
Partner news