Արցախում ականազերծման աշխատանքների ժամանակ ողբերգական դեպք է տեղի ունեցել. Մարտակերտի հարեւանությամբ՝ չեզոք գոտում, ականի վրա «Նիվա» մակնիշի ավտոմեքենա է պայթել: Պատահարի հետեւանքով 3 մարդ զոհվել է, 2 վիրավոր կա: Բոլորն Արցախի բնակիչներ են, բրիտանական HALO Trust կազմակերպության աշխատակիցներ:
Պայթյունի հետեւանքով զոհված սակրավորներն են Պավել Հակոբովը, Մարատ Պետրոսյանն ու Սամսոն Ավանեսյանը, իսկ վիրավորները՝ 43-ամյա Արամ Մկրտչյանն ու 31-ամյա Գարիկ Ղահիրյանը: Արամ Մկրտչյանի մոտ ներքին արյունահոսություն է, փայծաղի պատռվածք: Նրան վիրահատել են. բժիշկները վիճակը գնահատում են ծանր, բայց կայուն: Իսկ Գարիկ Ղահիրյանն ականապայթյունային վիրավորում է ստացել զույգ ստորին վերջույթների շրջանում. երկու վերջույթներն էլ անդամահատել են: Նրա վիճակը ծանր է գնահատվում:
Երեւանում բացվել է սպառազինության եւ պաշտպանական տեխնոլոգիաների «ԱրմՀայԹեք-2018» երկրորդ միջազգային ցուցահանդեսը: Հայկական ընկերություններից բացի՝ ցուցահանդեսին մասնակցում են նաեւ արտասահմանյան կազմակերպություններ, այդ թվում՝ ռուսական, եվրոպական եւ ասիական: Ներկայացված են սպառազինության եւ պաշտպանական տեխնոլոգիաների բնագավառում նվաճումները, օտարերկրյա կազմակերպությունների արտադրատեսականին: «ԱրմՀայԹեք-2018»-ի շրջանակում նախատեսված է նաեւ գիտագործնական ծրագիր: Դրան մասնակցելու նպատակով Հայաստանում են ավելի քան 10 երկրների եւ ՀԱՊԿ-ի պատվիրակությունները:
Լրագրողներին Ռուսաստանի Ռազմատեխնիկական համագործակցության դաշնային ծառայության փոխտնօրեն Վլադիմիր Դրոժժովը հայտնել է, որ այս տարի Ռուսաստանը 100 միլիոն դոլարի նոր պաշտպանական վարկի շրջանակում զենք կմատակարարի Հայաստանին: Ավելի վաղ հայկական կողմը հայտնել էր, որ Երեւանը մտադիր է Մոսկվայից «ռազմավարական զսպման» զենք ձեռք բերել:
Արմեն Աշոտյանն արտաքին հարաբերությունների խորհրդարանական հանձնաժողովի անունից գրավոր հարցադրումներ է արել Հայաստանի կառավարությանը: Դրանք կապված են այն փաստի հետ, որ ԵՄ մի շարք երկրների պարագայում մուտքի վիզա ստանալու համար Հայաստանի քաղաքացիները պետք է դիմեն թուրքական «ՎիզաՄետրիկ» կազմակերպությանը: Աշոտյանը խոստացել է նաեւ տեղեկացրել կառավարության պատասխանի մասին:
Նշենք, որ վիզայի համար անհրաժեշտ փաստաթղթերի տրամադրման կարգի փոփոխության մասին Գերմանիայի դեսպանը հայտնել է երեկ: «ՎիզաՄետրիկ» ընկերությունը ռուս-թուրքական է, կենտրոնակայանը Թուրքիայում է: Գերմանացի դիվանագետը նշել է, որ ընկերությունն այս ոլորտում մեծ փորձ ունի եւ շահել է Հայաստանում ու Միջին Ասիայում ծառայությունների մատուցման մրցույթում: Մաթիաս Քիսլերը, միաժամանակ, վստահեցրել է, որ Հայաստանի քաղաքացիների համար ոչ մի խնդիր չի առաջանա, իսկ անձնական տվյալների պաշտպանությունն իրենց համար բարձրագույն արժեք է:
Պաշտոնից հեռացող Սերժ Սարգսյանին կառավարությունը բնակարան է նվիրում: Որոշման նախագիծը գործադիրի այսօրվա նիստում քննարկվել է փակ ռեժիմով: Նիստից հետո հրապարակված փաստաթղթում նշվում է, որ Սերժ Սարգսյանին սեփականության իրավունքով անհատույց կտրամադրվեն «Կոնդի առանձնատների տնտեսություն» ՊՈԱԿ-ի հաշվեկշռում գրանցված 6-րդ մասնաճյուղի մեջ մտնող շենքերը, շինությունները եւ սպասարկող տարածքը: Որոշումն ուժի մեջ կմտնի ապրիլի 9-ից, երբ կավարտվի նախագահի լիազորությունների ժամկետը:
Գործադիրն այսօր որոշել է նաեւ Էրեբունի-Երեւանի 2800-ամյակին նվիրված հոբելյանական միջոցառումներն անցկացնել սեպտեմբերի 29-ին եւ 30-ին: Երեւանի տոնը սովորաբար նշվում է հոկտեմբերի երկրորդ կիրակի, իսկ օրը փոխելու պատճառը Ֆրանկոֆոնիայի 17-րդ գագաթնաժողովն է. Հայաստանն այն հյուրընկալելու է նոյեմբերին:
Կարեն Կարապետյանն այսօր առաջարկել է փոխել նաեւ մարզերի զարգացման ծրագրերի ներկայացման ժամկետը: Մինչեւ հիմա մարզպետերը դրանք ներկայացնում էին փետրվարի 15-ին: Վարչապետը կարծում է՝ շատ ուշ է: Կառավարության նիստից հետո կայացած ճեպազրույցում էլ Դավիթ Լոքյանին ուղղված հարցերը հիմնականում քաղաքական են եղել: Հնչել է ավանդական հարցը. Սերժ Սարգսյանին տեսնո՞ւմ եք Հայաստանի վարչապետի պաշտոնում: Իսկ նախարարն իրեն տեսնո՞ւմ է նոր կառավարության կազմում, հաշվի առնելով վերջին շրջանում մամուլի հրապարակումները, թե իր եւ դաշնակցական մեկ այլ նախարար Լեւոն Մկրտչյանի հետագա պաշտոնավարումը կասկածի տակ է: Դավիթ Լոքյանը պատասխանել է, թե մամուլում ամեն ինչ էլ հնարավոր է. մարդիկ պաշտոններ են զբաղեցնում, պաշտոնանկ են արվում: Բայց նման հարց, գոնե իր հետ կապված, դրված չէ:
Կեմերովոյի առեւտրի կենտրոնում կիրակի բռնկված խոշոր հրդեհի հետեւանքով զոհերի թվում 2 հայ կա, չնայած Ռուսաստանի ԱԻՆ-ը նախապես այլ տեղեկություն էր տրամադրել: Ռուսաստանի հայերի միությունից Գեորգի Անտոնով-Միրզախանյանը մեր թղթակցին ասել է, որ զոհվածներն են Դմիտրի Սարգսի Գալանինն ու նրա որդին՝ Միխայիլը: Հայրը 43 տարեկան էր, որդին՝ 10 տարեկան: Դմիտրի Գալինինը թիկնապահ էր:
Անտոնով-Միրզախանյանի տեղեկացմամբ՝ մարտի 25-ին հայր ու որդի առեւտրի կենտրոն էին գնացել՝ միասին ժամանակ անցկացնելու: Զոհված հայերի հիշատակին այսօր տեղի եկեղեցում պատարագ է մատուցվել: Հիշեցնենք, որ Կեմերովոյի «Զիմնյայա վիշնյա» առեւտրի կենտրոնում հրդեհի հետեւանքով 64 մարդ է զոհվել, 79 տուժած կա: Զոհերի թվով ողբերգական այս պատահարը վերջին 100 տարվա ընթացքում Ռուսաստանի չորս խոշորագույն հրդեհներից մեկն է:
Ալավերդիում 3-րդ հարկից ընկած 2 տարեկան երեխան մահացել է: Նա մի քանի օր հիվանդանոցի վերակենդանացման բաժանմունքում էր: Բժիշկների տեղեկացմամբ՝ փոքրիկ Մարիետան շենքի 3-րդ հարկից ընկել էր գլխի վրա ու կյանքի հետ անհամատեղելի վնասվածքներ ստացել: Հիշեցնենք, որ դեպքը տեղի է ունեցել մարտի 21-ին:
Ռուսաստանի դեմ սկսված արշավը հասավ նաեւ սպորտին: Մոսկվայում ԱՄՆ դեսպանատունը մուտքի վիզա չի տրամադրել ազատ ոճի ըմբշամարտի Ռուսաստանի հավաքականի մարզիկներին: Մոսկվայում ամերիկացիների այս քայլը Ռուսաստանի թիմի հանդեպ խտրականություն են որակել՝ հավելելով, որ չի կարելի ԱՄՆ-ում միջազգային մրցաշարեր անցկացնել: Ազատ ոճի ըմբշամարտի Ռուսաստանի հավաքականն ամերիկյան Այովա Սիթիում պետք է մասնակցեր աշխարհի գավաթի խաղարկությանը:
Մարտի 29-ին դոլարը կայուն է եղել, եվրոն նվազել է ավելի քան 4 դրամով: Դոլարի փոխարժեքն արդյունքում կազմել է 480 դրամ, եվրոյինը՝ 591, ռուբլունը՝ 8 դրամ 33 լումա, ֆունտինը՝ 675 դրամ:
Մարտի 30-ին հանրապետության ամբողջ տարածքում սպասվում են անձրեւի տեսքով առատ տեղումներ եւ ամպրոպ, ամպրոպի ժամանակ՝ քամու ուժգնացում: Օդի ջերմաստիճանը 5-6 աստիճանով կնվազի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +12+14, ցերեկը՝ +16+18 աստիճան տաքություն: