Լրագրող Տիրայր Մուրադյանի նկատմամբ բռնություն գործադրելու, մասնագիտական գործունեությանը խոչընդոտելու դեպքով քրեական գործ է հարուցվել: Այս մասին իր ֆեյսբուքյան էջում գրել է Քննչական կոմիտեի նախագահի խորհրդական Սոնա Տռուզյանը:
«Նախաքննության կատարումը հանձնարարվել է ՀԿԳ քննության գլխավոր քննչական վարչությանը»,- գրել է Սոնա Տռուզյանը:
Ավելի վաղ «Իրազեկ քաղաքացիների միավորման» ղեկավար Դանիել Իոաննիսյանը NEWS.am-ին հայտնել էր, որ Տիրայր Մուրադյանը այսօր Կառավարության մասնաշենքի մոտ ոչ թե հավաքն էր լուսաբանում, այլ հետաքննում էր քաղաքացիական հագուստով ոստիկանների մասնակցությունը հավաքին. «Տիրայրին ծեծող անձինք քրեական հետախուզության աշխատակիցներ են եղել, նրան հետեւել են, այնպիսի տեղ են բռնացրել, որ քիչ մարդիկ լինեն եւ մոտ 2 րոպե ծեծել են բազմաթիվ համազգեստով ոստիկանների ներկայությամբ, որոնք չեն միջամտել»:
Տիրայր Մուրադյանը գլխի փափուկ հյուսվածքների սալջարդ է ստացել: