Երեւանի փողոցներում ապրիլի 26-ին շարունակում են երթեւեկել առանց պետահամարանիշների եւ համարները մասամբ փակված ավտոմեքենաներ։
Այս ավտոմեքենաները մայրաքաղաքի փողոցներում հայտնվել են վարչապետի հրաժարականի առնչությամբ զանգվածային էյֆորիայի պահից։ Երիտասարդները, հաճախ նաեւ ոչ չափահաս, սկսել են պտտվել քաղաքով՝ ազդանշաններ տալով եւ ճանապարհային երթեւեկության կանոնները խախտելով։ Մեքենաների այսպիսի «վարքագիծը» արդեն դարձել է մի քանի սարսափելի ավտովթարների եւ հետիոտների վրաերթերի պատճառ։ Վրաերթերից մեկի պատճառով էլ զոհվել է 1 տարեկան երեխա։
Վերջապես, ճանապարհային ոստիկանությունը ուշքի է եկել եւ սկսել է այդ մեքենաները տուգանել, իսկ վարորդների նկատմամբ կազմել վարչական արձանագրություններ։ Բուռն տոնող երիտասարդների պահվածքը առաջացրել է մայրաքաղաքի բնակիչների զայրույթը, իսկ սոցիալական ցանցերում՝ օգտատերերի վրդովմունքը։
Այս ավտոմեքենաների գործողությունները քննադատել են նաեւ ապրիլի 25-ի երեկոյան ցույցի ժամանակ։ Նիկոլ Փաշինյանը ապրիլի 26-ի կեսօրին սկսված երթին կոչ է արել իր կողմնակիցներին ճանապարհները փակելու փոխարեն հետեւել ճանապարհային երթեւեկության կանոններին եւ երթեւեկել բաց համարներով։ Փաշինյանը շեշտել է, որ ովքեր փակում են համարները, շարժման հետ չեն։