Երեւանում արտակարգ դեպք է տեղի ունեցել: Հարձակովել են HSBC բանկի՝ Կոմիտաս-Գյուլբենկյան խաչմերուկում գործող մասնաճյուղի վրա. զոհեր եւ վիրավորներ կան: Դանակով, հրացանով եւ նռնակով զինված տղամարդը ներխուժել է բանկ, վիրավորել երկու աշխատակցի, այնուհետեւ խոշոր գումար հափշտակել եւ փախուստի դիմել, սակայն հեռու փախչել չի հաջողվել: Վիրավորներից մեկը՝ բանկի անվտանգության աշխատակից Խաչատուր Գալստյանը, մահացել է: Վիրավորում ստացած մյուս աշխատակիցը Եղվարդի բնակիչ Արամ Մկրտչյանն է: 25-ամյա Մկրտչյանը վիրավորում է ստացել կրծքավանդակի շրջանում. նա վիրահատվել է: Իսկ հանցագործին վնասազերծել ու բերման են ենթարկել:
Հանցագործին վնասազերծելիս վիրավորում է ստացել նաեւ մի ոստիկան՝ ավագ ենթասպա Արա Շախգուլյանը: Նրան հոսպիտալացրել են, վիրահատել, բայց չնայած բժիշկների ջանքերին՝ վիրավորի կյանքը փրկել չի հաջողվել: Պարզվում է՝ հանցագործը ոստիկան է. ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանը: Հանցագործության շարժառիթի մասին առայժմ ոչինչ չի հաղորդվում:
Ազգային ժողովի քառօրյայի այսօրվա նիստը կայացել է: Հիշեցնենք, որ երեկ չէր հաջողվել քվորում ապահովել, եւ նիստը տապալվել էր: Այսօր խորհրդարանում էր նաեւ «Ելք» խմբակցությունը: Դեռ երեկ Նիկոլ Փաշինյանը հայտնել էր, որ Ազգային ժողով են գնալու՝ իր առաջադրման համար փաստաթղթեր պատրաստելու: Մայիսի 8-ին կայանալիք վարչապետի ընտրության համար թեկնածուները պետք է առաջադրվեն պատգամավորների ընդհանուր թվի առնվազն 1/3-ի՝ 35 պատգամավորի կողմից: 41 ստորագրություն է հավաքվել, եւ առաջադրման համար անհրաժեշտ փաստաթղթերն արդեն ներկայացվել են խորհրդարան:
Եթե այս անգամ էլ, ինչպես մայիսի 1-ին, չհաջողվի վարչապետ ընտրել, ԱԺ-ն օրենքի ուժով կցրվի, եւ արտահերթ խորհրդարանական ընտրություններ կանցկացվեն: «Ելք»-ում վստահ են, որ ստեղծված իրավիճակը, ամեն դեպքում, ավարտվելու է Նիկոլ Փաշինյանի՝ վարչապետ դառնալով:
ՀՀԿ խմբակցությունը երեկ նիստ էր հրավիրել եւ որոշել վարչապետի թեկնածու չառաջադրել, այլ սատարել պատգամավորների 1/3-ի առաջադրած թեկնածուին: Չնայած սրան՝ Էդուարդ Շարմազանովը հայտարարել է, որ քվեարկելու է այնպես, ինչպես մայիսի 1-ին: Իրենց «սկզբունքներին եւ դիրքորոշմանը չդավաճանելու» մասին հայտարարում են նաեւ հանրապետական այլ պատգամավորներ:
ՀՅԴ խմբակցության քարտուղար Աղվան Վարդանյանն այսօր հրաժարականի դիմում է ներկայացրել: Մայիսի 1-ին ԱԺ հատուկ նիստում վարչապետի թեկնածուի քննարկման ժամանակ Աղվան Վարդանյանը հայտարարեց, որ չնայած ՀՅԴ խմբակցությունը որոշել է կողմ քվեարկել Նիկոլ Փաշինյանին, սակայն ինքը դա չի անի: Կարճ ժամանակ անց ՀՅԴ Հայաստանի Գերագույն մարմինը պահանջեց վայր դնել պատգամավորական մանդատը: Արմեն Ռուստամյանը չի բացառում, որ նաեւ կուսակցությունից Աղվան Վարդանյանի հեռացման հարց դրվի: Բայց առայժմ սա չի քննարկվել:
Դաշնակցության համամասնական ցուցակում հաջորդ թեկնածուն Ռուզաննա Առաքելյանն է. նա Ազգային ժողովի պատգամավոր է եղել նաեւ 2007-2012 թվականներին: Կուսակցությունում, սակայն, դեռ չեն շտապում հայտարարել, որ հենց նա է խորհրդարանում փոխարինելու Աղվան Վարդանյանին:
Մինչ այդ, մամուլում լուրեր են շրջանառվում, որ շուտով մանդատին հրաժեշտ կտա մեկ այլ պատգամավոր՝ «Ծառուկյան» խմբակցությունից Իշխան Զաքարյանը: Տարբեր տեղեկություններով՝ նրա եւ Գագիկ Ծառուկյանի հարաբերությունները լարված են: Ասում են՝ Ծառուկյանին դուր չի եկել, որ մայիսի 1-ին վարչապետի ընտրության ժամանակ Իշխան Զաքարյանը խորհրդարան չի գնացել, չնայած ինքը հայտարարել էր, որ «Ծառուկյան» խմբակցությունը մեկ մարդու նման քվեարկելու է Փաշինյանի օգտին: Իշխան Զաքարյանը հերքում է այս լուրերը:
Այսօր կառավարության հերթական նիստն էր: Այն վերջին անգամ վարել է Կարեն Կարապետյանը եւ վերջին հանձնարարականն է տվել: Վարչապետի պաշտոնակատարը տեղեկացրել է, որ օրակարգում միայն ընթացիկ հարցեր են ընդգրկել, իսկ ֆունդամենտալ հարցերի քննարկումը հաջորդ կառավարությանն են թողել: Վերջում Կարապետյանը չի մոռացել գործընկերներին շնորհակալություն հայտնել համատեղ աշխատանքի համար:
Սիրիայում ռուսական ռազմական օդանավ է կործանվել: Սու-30ՍՄ կործանիչը աղետի է ենթարկվել Միջերկրական ծովի վրա՝ Լաթաքիայի շրջանի Ջաբլա քաղաքի մերձակայքում: Երկու օդաչուները զոհվել են: Նրանցից մեկն ազգությամբ հայ է՝ անձնակազմի հրամանատար, մայոր Ալբերտ Դավիդյանը: Ռուսական պաշտոնական աղբյուրների տեղեկացմամբ՝ օդանավը դուրս է եկել «Հմեյմիմ» ռազմաբազայից, սակայն բարձրություն հավաքելիս ծովն է ընկել: Ինքնաթիռի վրա հարձակում չի եղել: Նախնական վարկածներից մեկի համաձայն՝ շարժիչի մեջ թռչուն է հայտնվել, ինչն էլ աղետի պատճառ է դարձել:
Ռուսաստանում ավարտված հունահռոմեական ըմբշամարտի Եվրոպայի առաջնությունում Հայաստանը նվաճեց երկու ոսկե, մեկ բրոնզե մեդալ: Աշխարհի եռակի չեմպիոն, օլիմպիական չեմպիոն Արթուր Ալեքսանյանը Եվրոպայի չեմպիոն դարձավ 4-րդ անգամ: Կասպիյսկ քաղաքում անցկացված առաջնության 97 կգ քաշային կարգում Ալեքսանյանը Եվրոպայի չեմպիոնի կոչումը վիճարկեց Սերբիայի ներկայացուցիչ Միխեիլ Կաջայայի հետ գոտեմարտում եւ հաղթեց 7:0 հաշվով:
Աշխարհի չեմպիոն Մաքսիմ Մանուկյանը Եվրոպայի չեմպիոնի կոչումը նվաճեց 82 կգ քաշային կարգում: Եզրափակիչում Մաքսիմ Մանուկյանն առանց խնդիրների պարտության մատնեց բելառուս Վիկտոր Սասունովսկուն՝ գոտեմարտն ավարտելով 8:0 հաշվով: 67 կգ քաշային կարգում էլ Կարեն Ասլանյանը բրոնզե մեդալի համար գոտեմարտեց լեհ Դավիդ Կարեցինսկու հետ եւ հաղթեց մեծ առավելությամբ՝ արդեն առաջին մրցափուլում վաստակելով 6 միավոր: Հայ ըմբիշը մրցակցին պարտության մատնեց 7:2 հաշվով:
Մայիսի 3-ին դոլարը, եվրոն եւ ռուբլին թանկացել են: Դոլարի փոխարժեքը կազմել է 484 դրամ, եվրոյինը՝ 581, ռուբլունը՝ 7 դրամ 65 լումա, ֆունտինը՝ 659 դրամ:
Մայիսի 4-8-ը հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում նույնպես վաղը կեսօրից հետո տեղումներ կլինեն: Մայրաքաղաքում գիշերը կդիտվի +11+13, ցերեկը՝ +25+27 աստիճան տաքություն: