Նիկոլ Փաշինյանը երկօրյա այցով Ռուսաստան է մեկնել: Այցի շրջանակում Հայաստանի վարչապետը հանդիպել է ՌԴ նախագահ Վլադիմիր Պուտինի հետ: Սա, ի դեպ, մեկ ամսվա ընթացքում Փաշինյան-Պուտին երկրորդ հանդիպումն է: Վաղը Նիկոլ Փաշինյանը Մոսկվայի «Լուժնիկի» մարզադաշտում ներկա կգտնվի ֆուտբոլի Աշխարհի առաջնության բացման հանդիսավոր արարողությանն ու առաջնության առաջին խաղին: Ի դեպ՝ Մոսկվայի օդանավակայանում Փաշինյանը ֆուտբոլ է խաղացել Աշխարհի գավաթի խորհրդանիշ «Զաբիվակա» գայլի հետ:

Ավելի քան 2 տարի կալանքի տակ գտնվող Ժիրայր Սեֆիլյանը, Գեւորգ Սաֆարյանն ու գործով մյուս ամբաստանյալներն այսօր դատարանի դահլիճից ազատ արձակվեցին: Ամբաստանյալները չեն արդարացվել, սակայն Վերաքննիչ դատարանը նվազեցրել է նրանց պատժաչափերն ու փոխել խափանման միջոցը: Առաջին ատյանի վճռով 10 տարի 5 ամիս ժամկետով ազատազրկման դատապարտված Ժիրայր Սեֆիլյանի համար Վերաքննիչը վերջնական պատժաչափ է սահմանել 5 տարի 5 ամիս ժամկետով ազատազրկումը: Միաժամանակ, դատարանը բավարարել է Սեֆիլյանի խափանման միջոցը փոխելու մասին միջնորդությունը եւ որոշել ԱԺ պատգամավորների երաշխավորությամբ ազատ արձակել նրան. «Ծառուկյան» խմբակցությունից 12 եւ «Ելք»-ից մեկ պատգամավոր որպես գրավ 500.000-ական դրամ են վճարել: 

Դատարանի շենքից դուրս գալուց հետո Սեֆիլյանը հայտարարել է, որ իրենց պայքարը չի ավարտվել: Նա հույս է հայտնել, որ բոլոր քաղբանտարկյալները շուտով ազատության մեջ կլինեն: Ինչ վերաբերում է մյուս ամբաստանյալներին. Գեւորգ Սաֆարյանի համար պատժաչափ է սահմանվել 2 տարի 6 ամիս ժամկետով ազատազրկումը, մյուս 4-ի համար՝ 2-ական տարվա ազատազրկումը: Նրանք էլ ազատ են արձակվել չհեռանալու մասին ստորագրությամբ:

«Սասնա ծռերի» անդամ Սեդրակ Նազարյանն այսօր ազատ է արձակվել դատարանի դահլիճից: Նրա համար երաշխավորություն ներկայացրած «Ծառուկյան» դաշինքի պատգամավորներ Նաիրա Զոհրաբյանն ու Վահե Էնֆիաջյանը դատարան էին եկել՝ իրենց երաշխավորությունը հաստատելու համար: Այսպիսով, «Սասնա ծռեր» զինված խմբի անդամներից 6-ն արդեն ազատության մեջ են:

Միաժամանակ, ԱԺ 11 պատգամավորներ էլ հանդես են եկել Սամվել Բաբայանի եւ Սանասար Գաբրիելյանի խափանման միջոց փոխելու անձնական երաշխավորությամբ: Արցախի պաշտպանության բանակի նախկին հրամանատարի գործով բողոքը Վճռաբեկ դատարանը կքննի հունիսի 15-ին:

Արցախի պաշտպանության նախարարությունը կրկին հայտնել է շփման գծում ադրբեջանական զինտեխնիկայի եւ մարդկային ուժի ակտիվ տեղաշարժերի եւ կուտակումների մասին: Հակառակորդը վերջին շրջանում նաեւ ակտիվ է տեղեկատվական եւ քարոզչական դաշտում: Հարցը Հայաստանի ղեկավարությունը բարձրացրել է ԵԱՀԿ Մինսկի խմբի համանախագահների հետ հանդիպումների ընթացքում:

Շփման գծում կուտակումների մասին այսօր խոսել է նաեւ Զինված ուժերի գլխավոր շտաբի պետ Արտակ Դավթյանը: Նա ավելորդ է համարել մեկնաբանություններ տալ, սակայն, ամեն դեպքում, անդրադարձել է սահմանային իրավիճակին:

Ինչ վերաբերում է այս օրերին քննարկվող մեկ այլ թեմայի՝ հայկական վերահսկողության տակ գտնվող Գյուննուտի գերեզմաններ ադրբեջանցիների այցին. Արտակ Դավթյանը նշել է, որ հակամարտությունն Ադրբեջանի ժողովրդի, խաղաղ բնակիչների եւ հատկապես հանգուցյալների հետ չէ: Հիշեցնենք, որ Արտակ Դավթյանը գլխավոր շտաբի պետ է նշանակվել շուրջ 20 օր առաջ: Նրա նշանակումը բուռն քննադատությունների առիթ դարձավ: Պաշտպանության նախկին փոխնախարար Արթուր Աղաբեկյանը, մասնավորապես, հայտարարեց, որ « ամենապատասխանատու պաշտոնում նշանակվել է ամենաանպատրաստ գեներալը»: Արտակ Դավթյանն այսօր հայտարարել է, որ դրական է վերաբերվում քննադատություններին, իսկ ժամանակը ցույց կտա, որ դրանք իրականության հետ որեւէ աղերս չունեն:

Ազգային ժողովն այսօր չկարողացավ Սահմանադրական դատարանի դատավոր ընտրել: Դատավորների ընդհանուր ժողովի ընտրած թեկնածուն Վճռաբեկ դատարանի քրեական պալատի դատավոր Ելիզավետա Դանիելյանն էր: Քվեարկությանը մասնակցել է 105 պատգամավորներից 54-ը: Դանիելյանի թեկնածությանը կողմ է քվեարկել 36, դեմ՝ 17 պատգամավոր, մինչդեռ ընտրվելու համար անհրաժեշտ էր 63 կողմ քվե: Ավելի վաղ էլ խորհրդարանը չէր հաստատել Էմիլ Բաբայանի թեկնածությունը. նրան առաջադրել էր Արմեն Սարգսյանը: Ավելի քան 200 փաստաբաններ նամակով դիմել են նախագահին՝ առաջարկելով այդ պաշտոնի համար մրցույթ անցկացնել եւ նշել, որ իրենց նախընտրելի թեկնածուն փաստաբան Վահե Գրիգորյանն է:

Իսկ խորհրդարանի միջանցքներում այսօրվա թոփ թեման Մանե Թանդիլյանի հրաժարականն էր: Պարտադիր կուտակային համակարգը ներդնելու վերաբերյալ որոշման ընդունումից 1 օր անց աշխատանքի եւ սոցիալական հարցերի նախարար Մանե Թանդիլյանը երեկ երեկոյան հրաժարականի դիմում ներկայացրեց եւ հայտարարեց նաեւ «Լուսավոր Հայաստան» կուսակցությունից դուրս գալու մասին: Նրա այս քայլը, կարծես, ամենից շատ ՀՀԿ-ական Էդուարդ Շարմազանովին է ոգեւորել:

Լրագրողները փորձել են «Լուսավոր Հայաստան» կուսակցության փոխնախագահի որոշման մասին տեղեկություն ու պարզաբանում ստանալ նաեւ կուսակցության առաջնորդ Էդմոն Մարուքյանից: Նշենք, որ Մանե Թանդիլյանից բացի՝ «Դեմ եմ» նախաձեռնության անդամներից էին նաեւ նախարարներ Արտակ Զեյնալյանն ու Արծվիկ Մինասյանը: Վերջինը, ի դեպ, կառավարության վերջին նիստի ժամանակ վիճել է վարչապետ Նիկոլ Փաշինյանի հետ, սակայն թեժ բանավեճից հետո կողմ քվեարկել որոշմանը: Լրագրողները դաշնակցական նախարարին հարցրել են՝ հնարավո՞ր է հետեւի Մանե Թանդիլյանի օրինակին:

Ազգային անվտանգության ծառայության աշխատակիցներն այսօր Երեւանի քաղաքապետարան էին «ներխուժել». այստեղ տեղակայված «Երեւան» հիմնադրամի աշխատասենյակներում խուզարկություններ են կատարվել: Պատճառը քաղաքացիներից ստացված հաղորդումն է այն մասին, որ քաղաքապետարանի պաշտոնատար անձինք, կառուցապատման եւ գույքի ձեւակերպման համապատասխան թույլտվություններ տրամադրելու դիմաց, օրենքով սահմանված վճարումներից բացի՝ իրենց պարտադրել են «Երեւան» հիմնադրամին խոշոր չափերով գումարներ փոխանցել: ԱԱԾ-ն պարզել է, որ առձեռն ստացված գումարների մի մասը հիմնադրամի հաշվեհամար չի մուտքագրվել եւ հափշտակվել է, արդյունքում քրեական գործ է հարուցվել:

Դիմակավորված ԱԱԾ-ականները քաղաքապետարանից հեռացել են՝ շենքից սեւ փաթեթներ դուրս բերելով: Նրանք, սակայն, հրաժարվել են հայտնել, թե ինչ կա փաթեթներում: Նշենք, որ «Երեւան» հիմնադրամի հոգաբարձուների խորհրդի նախագահը քաղաքապետ Տարոն Մարգարյանն է: Կրթության նախարար Արայիկ Հարությունյանն ու պատգամավոր Լենա Նազարյանն ամիսներ առաջ դատական հայց էին ներկայացրել հիմնադրամի դեմ: Առաջին դատական նիստը կկայանա առաջիկայում, իսկ մինչ այդ, ըստ լուրերի, Երեւանի ավագանին պատրաստվում է առաջիկա նիստում քննարկել հիմնադրամի լուծարման հարցը:

Աուտիզմ ունեցող կորած տղային արդեն 5 օր է՝ չեն կարողանում գտնել: 14-ամյա Հայկին որոնում է ԱԻՆ 2 փրկարար ջոկատ, ավելի քան 150 կամավորներ, Էջմիածնի մերձակա գյուղերի բնակիչները. վերջին անգամ երեխային Արմավիրում են տեսել: Ակտիվիստներն այսօր նաեւ օդապարիկ են օգտագործել՝ վերեւից տեղանքն ուսումնասիրելու համար: Նշենք, որ Հայկ Հարությունյանը տնից դուրս է եկել հունիսի 8-ին, ժամը մոտ 17:00-ին: Նա կանաչ շապիկով է, քայլում է բոբիկ, չի խոսում, խուսափում է մարդկանց հետ շփումներից: Ակտիվիստները հորդորում են Հայկին տեսնելու դեպքում փորձել նրան սիրաշահել քաղցրավենիքով, ամեն ինչ անել, որպեսզի մինչեւ ծնողների կամ ոստիկանության ժամանումը տղան չհեռանա:

Վրաստանի վարչապետը հրաժարական է ներկայացրել. Գիորգի Կվիրիկաշվիլին ինքն է հայտնել այդ մասին: Նա Վրաստանի կառավարությունը ղեկավարում էր 2013 թվականի հուլիսից: Կվիրիկաշվիլին ասել է, որ տեսնում է իր թիմում առկա տրամադրվածությունն ու որոշել է հեռանալ պաշտոնից: Ըստ տեղեկությունների՝ հրաժարականի պատճառն իշխող «Վրացական երազանք» կուսակցության ղեկավար Բիձինա Իվանիշվիլիի հետ Կվիրիկաշվիլիի տարաձայնություններն են: Նշենք, որ նախօրեին կայացել է իշխող կուսակցության պատգամավորների հանդիպումը: Հավաքից հետո, սակայն, պատգամավորները հերքել են տարածված լուրերը, թե կառավարությունում փոփոխությունների հարց է քննարկվել: Մամուլի տեղեկություններով՝ վարչապետի պաշտոնը կարող է զբաղեցնել Վրաստանի ՆԳ նախարար Գեորգի Գախարիան:

Հունիսի 13-ին դոլարն ու եվրոն էժանացել են: Դոլարի փոխարժեքը կազմել է 482 դրամ, եվրոյինը՝ 567, ռուբլունը՝ 7 դրամ 67 լումա, ֆունտինը՝ 643 դրամ:

Հունիսի 14-ին երեկոյան ժամերին եւ 15-18-ի գիշերը հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը երեկոյան ժամերին տեղումներ կլինեն: Մայրաքաղաքում գիշերը կդիտվի +14+16, ցերեկը՝ +28+30 աստիճան տաքություն: