Հերոս լինելը մի բան է, հերոսի կերպարը պահպանելը՝ այլ բան: Պաշտպանության նախկին նախարար Սեյրան Օհանյանը NEWS.am-ի հետ զրույցում այսպես ձեւակերպեց ՀՀԿ խմբակցության պատգամավոր, գեներալ Մանվել Գրիգորյանի արարքը:
Սեյրան Օհանյանը, որն այդ ժամանակ պաշտպանության նախարար էր, մեզ հետ զրույցում վստահեցրեց, թե ԱԱԾ տեսանյութից է տեղեկացել այդ մասին, իսկ նախարարությունը չէր կարող վերահսկողություն իրականացնել՝ արդյոք քաղաքացիների աջակցությունն ամբողջությամբ տեղ հասել է, թե ոչ:
«Մանվել Գրիգորյանին ի սկզբանե ճանաչել եմ որպես մարտական, զինվորական ճանապարհ անցած անձնավորության, որի հիմնական ուղղությունը եղել է Արցախյան ազատամարտը եւ նա ներդրում է ունեցել այնտեղ: Դրա համար գնահատել եմ: Բայց այն, ինչ տեսանք լրատվամիջոցներով, դա բոլորի եւ նաեւ իմ կողմից դատապարտելի է: Ես ինքս անձամբ ցավ եմ ապրում այն ամենի համար, ինչ հայտնաբերվեց այնտեղ: Ցավ եմ ապրում մատաղ սերնդի՝ աշակերտների նկատմամբ այդ վերաբեմունքի հետ կապված, որոնք իրենց սիրտն ու հոգին էին դրել այդ աջակցության մեջ»,-ասաց պաշտպանության նախկին նախարարը:
Սեյրան Օհանյանը նշեց, որ իրավապահները պետք է պարզեն այդ ամենին մասնակցության շրջանակը եւ պատասխանատվության ենթարկեն բոլոր մեղավորներին, սակայն պաշտպանության նախարարությունը չէ, որ պետք է այդ վերահսկողությունը իրականացներ:
«Պաշտպանության նախարարությունը համապատասխան ապահովում իրականացնում է, վերահսկում է որակը, ժամանակին ապահովելը, բայց անմիջապես նյութատեխնիկական ապահովումը տեղի է ունենում այլ օղակների ներքո: Նախարարությունն իրավասություն չունի քաղաքացիական անձանց եւ տարբեր հասարակական կազմակերպությունների նկատմամբ վերահսկողության անցկացնելու: Պետք է պարզել եւ դրա շրջանակում մարդիկ պետք է կրեն պատասխանատվություն»,-ընդգծեց Օհանյանը:
ՊՆ նախկին ղեկավարն ընդգծեց, որ ՊՆ ղեկավարությունը գնումների գործընթացում, նաև թիկունքային ապահովման գործընթացում գնումներ իրականացնելու, գնումների ընթացքում որակի, քանակի, ճիշտ ժամանակին մատակարարումն իրականացնելու համար է պատասխանատու, իսկ տեղում արդեն պատասխանատու են համապատասխան կառույցները, որոնք ներքին՝ զորամասային օղակում են: Նրա խոսքով, բոլոր օգնությունների համար ստեղծված է եղել հանձնախումբ, և համապատասխան ուղղություններով այդ օգնությունների բաշխում է եղել, դա պետք է ճշտել Արցախի Հանրապետության ղեկավարությունից:
«Ես, իհարկե, տեղյակ չեմ եղել դրա մասին: Ինչ վերաբերում է զորամասային օղակում մատակարարումներին, ապա դրանք բաշխվում են հենց զորամասի ստորաբաժանումների միջև, իսկ այդ ստորաբաժանումները տեղաբաշխված են տարբեր ուղղություններով, տարբեր տեղանքներում, թե ինչպես է այդ ամենն իրականացվել, իրավապահ մարմինները պետք է պարզեն»,-ընդգծեց Սեյրան Օհանյանը:
Հիշեցմանը, որ ապրիլյան պատերազմի օրերին քաղաքացիները, մամուլը ահազանգում էին, որ շատերի օգնությունը տեղ չի հասել, Օհանյանն ասաց՝ հանձնախումբ էր ստեղծվել, որը զբաղվում էր օգնության բաշխմամբ. «Ստեղծվել է հանձնախումբ, որն էլ վերահսկել է՝ ինչպես է բաշխվում, ՊՆ-ն չի վերահսկել: Երկրորդ՝ դժվար է վերահսկողություն իրականացնել յուրաքանչյուր ստորաբաժանման հետ կապված: Ի վերջո, բոլորը նվիրված լծվել էին այդ գործին»:
Հարցին, թե ինչպես կբնութագրի այն զինվորականներին, մարդկանց, որոնք բանակի բյուջեն ու զինվորի հասանելիքը յուրացրել են, ինչի վերաբերյալ այս օրերին սկանդալային բացահայտումներ են արվել, Սեյրան Օհանյանը պատասխանեց. «Նախեւառաջ նրանք զինվորականներ չեն, 2008-ից բանակում չէ Մանվել Գրիգորյանը: Բանակի հետ կապը եղել է այնքանով, որքանով որ ՀԿ-ների հետ ենք կապ ունեցել: Իհարկե, երեւույթը դուրս է բոլոր բարոյական նորմերից, որովհետեւ դրանով արտահայտվում է վերաբերմունքը բանակի եւ մատաղ սերնդի նկատմամբ: Հաշվի առնելով անմեղության կանխավարկածը՝ այդպիսի դեպքերի բարոյական գնահատականը մենք տալիս ենք, բայց իրավականը կտա իրավապահ համակարգը: Սպասենք վերջնական գնահատականին: Նա ունեցել է համապատասխան ներդրում Արցախյան ազատամարտին, բայց ես կասեմ՝ մեկ բան է լինել հերոս, մեկ բան է պահպանել այդ կերպարը»:
Հիշեցնենք, որ այսօր Ազգային ժողովի արտահերթ նիստում ՀՀԿ խմբակցության պատգամավոր Մանվել Գրիգորյանը զրկվեց անձեռնմխելիությունից, ինչը նշանակում է, որ ձերբակալության ժամկետը լրանալուց հետո, կկալանավորվի:
Ավելի վաղ NEWS.am-ը հայտնել էր, որ օրեր առաջ Ազգային անվտանգության ծառայությունը Մանվել Գրիգորյանի ամառանոցում բացահայտեց անօրինական զենք զինամթերք, ինչպես նաեւ ապրիլյան պատերազմում դպրոցականների՝ զինվորներին ուղարկած օգնությունը, որը չէր հասել զինվորներին: ԱԱԾ-ն բացահայտել է, որ դպրոցահասակների հանգանակած օգնությունը՝ սննդից մինչեւ դողորայք եւ ներքնազգեստ, Մանվել Գրիգորյանը յուրացրել է, խտացրած կաթով ու պահածոյացված մսով կերակրել իր արջերին ու վայրի կենդանիներին:
