Պաշտոնական տվյալներով Հայաստանում կարտոֆիլի եւ բանջարեղենի ցանքատարածություններն այս տարի նախորդ տարվա համեմատ կրճատվել են: Անկումը բավականին լուրջ է, ուստի դիմել ենք Գյուղատնտեսության նախարարությանը`խնդրելով բացատրել կատարվածի պատճառները:

Բանջարեղենի ներկայիս գների վերաբերյալ Գյուղատնտեսության նախարարությունը պնդում է, որ միանշանակ դրանք չի կարելի բարձր համարել: Չնայած մշակաբույսերի ցանքատարածությունները կրճատվել են, որոշ ապրանքատեսակների գները նախորդ տարվա համեմատ նույնիսկ ավելի ցածր են: Եվ իրականում, ըստ պաշտոնական տվյալների (որոնց շատ սպառողներ չեն վստահում), հուլիսին մթերքի միջին մանրածախ գները նվազել են` տարեկան կտրվածքով 1 տոկոսով:

Բայց կարելի  է արդյոք այս խորհրդանշական անկումը համարել ապրանքային շուկայում բանջարեղենի առաջարկի մեծ ծավալի ապացույց: Չէ որ, մանրածախ գինը որոշվում է ոչ միայն առաջարկով, այլ նաեւ վճարունակության պահանջարկով: Ավելի ճիշտ` այս երկու ցուցանիշների հարաբերակցությամբ: Որոշ գնորդների համար գումարը չբավականացնելու պայմաններում վաճառողները կարող են նվազեցնել գները ապրանքի վաճառքը արագացնելու համար:

Այնուհետ Գյուղատնտեսության նախարարությունը նշում է, որ Արմավիրի եւ Արարատի մարզերում կարտոֆիլի ցանքատարածությունները կրճատվել են, քանի որ անցյալ տարի դժվարություններ են եղել բերքի իրացման հետ կապված: Միեւնույն ժամանակ, նույն վայրերում, ֆերմերները ավելացրել են սոխի ցանքատարածությունները, քանի որ նախորդ տարվա գները բարձր էին:

 Սակայն, ըստ պաշտոնական տվյալների, նշված վայրերում սոխի ցանքատարածություններն այս տարի նվազել են նախորդ տարվա համեմատ` Արմավիրում` 109 հեկտարով, իսկ Արարատում` 28 հեկտարով: Սա նույն վայրերում կարտոֆիլի ցանքատարածությունների կրճատման ֆոնի վրա՝ 201 եւ 265 հեկտար համապատասխանաբար: Ընդհանուր առմամբ, երկրում նույն սոխի ցանքատարածությունները կրճատվել են 251 հեկտարով:

Սակայն հարցն առանձին մարզերում չէ, կամ առանձին գյուղատնտեսական մշակաբույսերում, ինչպիսին սոխն է: Խնդիրն այն է, որ բանջարեղենի եւ կարտոֆիլի ցանքատարածությունները առանց բացառության կրճատվել են բոլոր մարզերում: Այսինքն, անկումն ընդհանուր է: Ընդհանուր առմամբ, երկրում բանջարեղենի ցանքատարածությունները նվազել են 23 տոկոսով, իսկ կարտոֆիլինը՝ 12 տոկոսով: Նման երկնիշ թվերով անկումը լուրջ բացատրություն է պահանջում: Հարկ է նաեւ նշել, թե հաջորդ տարի նախարարությունը ինչ է մտադիր անել այս իրավիճակը կարգավորելու համար:

Հնարավոր է արդյոք այս տարվա ընթացքում գոնե անցյալ տարվա կարտոֆիլի բերքի ծավալը ստանալ: Պարզ հաշվարկը ցույց է տալիս, որ դրա համար կրճատվող ցանքատարածությունների պայմաններում միջին բերքատվության մոտ 15 տոկոս աճ է անհրաժեշտ:

Դրա համար, իր հերթին, պահանջվում են ժամանակակից տեխնոլոգիաներ եւ կայուն եղանակային պայմաններ (որոնք հազվադեպ են լինում մեր երկրում): Դե իսկ, «առաջադեմ տեխնոլոգիաների» մասին  ֆերմերները կարող են ասել:

Սմբատ Գրիգորյան