Հակառակորդի կրակոցից Հայաստանի զինված ուժերի զինծառայող է զոհվել: Հյուսիս-արեւելյան զորամասերից մեկի պահպանության տարածքում հրազենային վիրավորում է ստացել պայմանագրային զինծառայող, շարքային Հայկազ Մաթեւոսյանը: Հիվանդանոց տեղափոխվելու ճանապարհին 38-ամյա Մաթեւոսյանը մահացել է: Նա Զինված ուժերում ծառայության էր անցել 2011 թվականին: Հայկազ Մաթեւոսյանի մահվան փաստով քրեական գործ է հարուցվել:
Երեւանի ավագանու ընտրություններին ընդառաջ ոստիկանությունը հրապարակել է վերջնական ընտրացուցակները: Դրանց համաձայն՝ սեպտեմբերի 23-ին քվեարկելու իրավունք ունի 848.343 ընտրող:
Ավագանու ընտրություններին, ի դեպ, քվեարկելու իրավունք կունենան նաեւ Հայաստանի քաղաքացիություն չունեցող անձինք: Սակայն մեկ պայման կա. մինչեւ քվեարկության օրը նրանք պետք է առնվազն մեկ տարվա հաշվառում ունենան Երեւանում: Քաղաքացիություն չունեցող անձանց այս իրավունքը սահմանում է Ընտրական օրենսգիրքը:
Ազգային ժողովում ձեւավորված Քննիչ հանձնաժողովն այսօր անդրանիկ նիստն էր հրավիրել. այն ուսումնասիրելու է ԱԱԾ տնօրենի եւ ՀՔԾ պետի հեռախոսազրույցի գաղտնալսման դեպքը: Առաջին նիստը կարճ է տեւել. հանձնաժողովի նախագահ Գեւորգ Կոստանյանն առաջարկել է հետաձգել այն, որպեսզի մասնակիցները հնարավորություն ունենան առաջարկություններ ներկայացնել աշխատակարգի վերաբերյալ: Դեռ պետք է նաեւ հանձնաժողովի նախագահի տեղակալի թեկնածու առաջադրեն, առաջարկեն, թե ինչ փաստաթղթեր են անհրաժեշտ եւ որ մարմնից պետք է պահանջել, եւ արդյո՞ք անհրաժեշտ է միջազգային կազմակերպություններից մասնագետների հրավիրել: Հաջորդ նիստը կկայանա սեպտեմբերի 26-ին:
Ռոբերտ Քոչարյանը հերթական հարցազրույցն է տվել: Ռուսական «Կոմերսանտ»-ի հետ զրույցում նա խոսել է Մարտի 1-ի, քաղաքականություն իր վերադարձի, Հայաստանի ներքաղաքական իրադրության, Նիկոլ Փաշինյանի, նաեւ՝ Ռուսաստանի նախագահի հետ իր հարաբերությունների մասին: Նախ՝ վերջինի մասին: Քոչարյանն ասել է՝ իր ծննդյան տարեդարձի առիթով Վլադիմիր Պուտինի հեռախոսազանգը, որը քննարկումների առիթ դարձավ, մեծ աջակցություն էր իր համար:
Ինչ վերաբերում է իր վերադարձին. նախկին նախագահն ասել է՝ երբեք էլ չի հեռացել քաղաքականությունից, պարզապես վերջին տարիներին բավական պասիվ է եղել, բայց հիմա պատրաստվում է ավելի հաճախ արտահայտվել: Ռոբերտ Քոչարյանը հավաստել է նաեւ, որ իշխանություն չի փնտրում: Նաեւ կարծում է, որ ընդարմացած հասարակությանը ցույց տվեց, որ ոչ մի բանից վախենալ պետք չէ, պետք է սեփական տեսակետը հայտնել: Մարտի 1-ի մասին ասել է այն, ինչի մասին խոսել էր նախորդ հարցազրուցներում. մասնավորապես, զոհերի համար պատասխանատվությունն առաջին հերթին կրում են նրանք, ովքեր հրահրել են զանգվածային անկարգությունները:
Եվ, վերջապես, Նիկոլ Փաշինյանի մասին. գործող վարչապետին նախկին նախագահը գիսաստղի հետ է համեմատել, որը շատ արագ այրվում է: Հայաստանի ներկա իշխանությունը որակելով քաոսային, տնտեսությունից անտեղյակ, առանց հստակ աշխարհաքաղաքական գերակայությունների՝ Քոչարյանը կարծիք է հայտնել, որ վարչապետին, հավանաբար, մտահոգում են իր նախագահության ժամանակ ձեռք բերված արդյունքները: Իսկ այսօր, նախկին նախագահի գնահատմամբ, Հայաստանում ունենք հասարակության բաժանում՝ սեւերի եւ սպիտակների, գնաճ, ներդրումների բացակայություն, քանի որ վախեցրել են ոչ միայն սեփական, այլեւ արտասահմանյան ներդրողներին:
Թատրոնի եւ կինոյի պետական ինստիտուտի մի խումբ ուսանողներ դասադուլ են հայտարարել: Առավոտյան նրանք բողոքի ակցիա են անցկացրել ինստիտուտի շենքի մոտ. ռեկտոր Դավիթ Մուրադյանի եւ բուհի ղեկավար կազմի հրաժարականն են պահանջում: Ակցիային, ի դեպ, նաեւ դասախոսներ են միացել: Ասում են՝ խնդիրները բուհում շատ են, ուսանողները ցանկանում են պատշաճ ուսում ստանալ, որի համար վճարում են:
Ակցիայի մասնակիցներն ասում են՝ ռեկտորն անտեղյակ է, որ իր կողքի կաբինետում նստածը կարող է ինստիտուտի հաշվին «գումար լվանալ»: Ոստիկանությունն ավելի վաղ հայտարարել էր ինստիտուտում չարաշահումներ հայտնաբերելու մասին. 2012-2016 թվականներին այստեղ հասնիքներ են գրանցել, աշխատավարձ վճարել, բայց փաստացի պատկերն այլ է եղել: Ուսանողներն արդեն հանդիպել են ռեկտորի հետ, սակայն ընդհանուր հայտարարի չեն եկել: Ինստիտուտում չարաշահումների փաստերով քրեական գործ է հարուցվել:
«Ֆլորենս» փոթորկի հետեւանքով ԱՄՆ-ում զոհերի թիվն ավելանում է: Բնության աղետն արդեն 32 մարդու մահվան պատճառ է դարձել. զոհերի թվում նաեւ երեխաներ կան: Փոթորիկը պատուհասել է ամերիկյան Հյուսիսային եւ Հարավային Քարոլինա նահանգներին: «Ֆլորենս»-ը Միացյալ Նահանգների ատլանտյան ափերին է հասել սեպտեմբերի 14-ին: Փոթորկի ուժն արդեն թուլացել է, սակայն պահպանվում է հեղեղումների սպառնալիքը, քանի որ հսկայական քանակությամբ տեղումներ են գրանցվել: Աղետի գոտում հայտնված նահանգների ավելի քան 27 հազար բնակիչներ ժամանակավոր ապաստարաններում են: Շուրջ 523 հազար տուն եւ ձեռնարկություն հոսանքազրկվել է:
Դոլարը շարունակում է արժեզրկվել, եվրոն փոքր-ինչ թանկացել է: Սեպտեմբերի 19-ին դոլարի փոխարժեքը կազմել է 483 դրամ, եվրոյինը՝ 565, ռուբլունը՝ 7 դրամ 22 լումա, ֆունտինը՝ 637 դրամ:
Սեպտեմբերի 20-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +14+16, ցերեկը՝ +28+30 աստիճան տաքություն:
