Արարատի մարզի Նորամարգ գյուղում այսօր՝ մայիսի 30-ին, պայթյունի հետեւանքով մեկ մարդ է մահացել։

NEWS.am–ի հետ զրույցում «Էրեբունի» բժշկական կենտրոնի մամուլի խոսնակ Շուշան Հունանյանը հայտնեց, որ տղամարդուն հասցրել են հիվանդանոց, սակայն նրա կյանքը փրկել չի հաջողվել։

Նրա խոսքով՝ ԲԿ է տեղափոխվել նաեւ հղի կին, որը գտնվում է վերակենդանացման բաժանմունքում, բժիշկները նրա վիճակը գնահատում են կայուն, գինեկոլոգները հսկում են հղիությունը պահպանելու համար։

Հիվանդանոց է ընդունվել նաեւ մի կին, որին դեռեւս վիրահատում են։

Խոսնակի խոսքով՝ հիվանդանոց են բերել նաեւ կրծքի երեխայի, բայց նրան չեն հոսպիտալացրել։

Հիշեցնենք, որ նախնական վարկածի համաձայն՝ Նորամարգում տղամարդը կենցաղային հարցերի շուրջ ունեցած վեճի պատճառով պայթուցիկ է նետել նախկին կնոջ տան վրա եւ դիմել փախուստի։ Կասկածյալի ինքնությունը հայտնի է, իրավապահները որոնում են նրան։

Պայթյունի հետեւանքով բազմաբեկորային վնասվածքներով հիվանդանոց էր տեղափոխվել 4 քաղաքացի։

Նշենք, որ փաստի առթիվ ոստիկանության Մասիսի բաժնի հետաքննչական բաժանմունքում նյութեր են նախապատրաստվում։