NEWS.am–ի տեղեկություններով՝ Իջեւանի քաղաքապետ Վարդան Ղալումյանին հրավիրել են ոստիկանություն՝ հունիսի 15–ին Իջեւանում տեղի ունեցած միջադեպի կապակցությամբ բացատրություն տալու։ Ոստիկանությունից NEWS.am–ին հայտնեցին, որ հունիսի 15-ին, Տավուշի մարզում տեղի ունեցած միջադեպի փաստով ոստիկանությունում նյութեր են նախապատրաստվում, կատարվում է հետաքննություն։
Ավելի վաղ Shamshyan.com–ը հայտնել է որ ժամը 09:15-ի սահմաններում ոստիկանության Երեւան քաղաքի վարչության օպերատիվ կառավարման կենտրոն ահազանգ է ստացվել քաղաքացի Վալերի Մելիքբեկյանից, ով հայտնել է, որ Իջեւան քաղաքի Անկախության 13/41 հասցեում գտնվող իրեն պատկանող տարածքում Իջեւանի քաղաքապետ Վարդան Ղալումյանը քաղաքապետարանի աշխատակիցների հետ ապօրինի գործողություններ է կատարում տարածքում, եւ հարձակվել են տան անդամների վրա:
Ոստիկանությունում Վ. Մելիքբեկյանի կինը՝ Իջեւանի բնակիչ, 51-ամյա Նարինե Մելիքբեկյանը հայտնել է, որ նույն օրը իրենց ընտանիքին պատկանող հողամասում շինարարների դեմ ակցիա իրականացնելու ժամանակ Իջեւանի քաղաքապետ Վարդան Ղալումյանը մի քանի անգամ հարվածել է իր թիկունքին:
