Հայաստանի երկրորդ նախագահ Ռոբերտ Քոչարյանին չի կարելի մեղադրել «Մարտի 1»-ի գործով այն տեսակետից, ինչ տեսակետից դա արվում է։ Այս մասին դեկտեմբերի 23-ին հանրային քննարկումների շրջանակում հայտարարեց «Վերնատուն» ակումբի նախագահ Վազգեն Մանուկյանը։
Նա նկատեց, որ Քոչարյանի գործով շատ բան է ասվում, այդ թվում եւ այն, որ դա անձնական վրեժ է, այն, որ դա միջոց է ազատվել այն մարդկանցից, որոնք կարող են իրենց չեզոք կարծիքն ասել ղարաբաղյան հարցի մասին։
«Կարծում եմ, որ կա նաեւ պոպուլիզմի տարր իշխանությունների կողմից՝ հաշվի առնելով այն, որ հասարակության մի որոշակի մասը տրամադրված էր Քոչարյանի դեմ»,- ընդգծեց Մանուկյանը։
Հիշեցնենք, որ Ռոբերտ Քոչարյանը մեղադրվում է 2008թ․ մարտի 1-ի իրադարձությունների ժամանակ սահմանադրական կարգը տապալելու եւ հատկապես խոշոր չափերի կաշառք ստանալու մեջ։
