«Գոլոս Արմենիի» թերթի գլխավոր խմբագիր Ֆլորա Նախշքարյանը հաղորդում է տվել այն մասին, որ հունիսի 26-ին անհայտ անձը չպարզված եղանակով ապօրինի հասանելիություն է ստացել «Գոլոս Արմենիի» թերթի կայքի տվյալների շտեմարանին և ջնջել դրա որոշակի մասը, որի արդյունքում խափանվել է կայքի բնականոն աշխատանքը:
Ավելի վաղ՝ հունիսի 26-ին մամուլում գրվել էր, որ «Գոլոս Արմենիի» ռուսալեզու թերթի կայքէջն առավոտից չի աշխատում:
Գլխավոր խմբագիրը 168.am-ի հետ զրույցում նշել էր. «Սկզբից հնարավոր չէր մտնել կայք, հիմա հնարավոր է, բայց կայքում ոչինչ չկա՝ սրբված է տվյալները, բազաները: Կայքը սպասարկողները փորձում են ինչ-որ կերպ վերականգնել, սակայն ոչինչ դեռ չի ասվում՝ հնարավո՞ր է վերականգնել, թե՞ հնարավոր չէ: Ի դեպ, ասեմ, որ մեկ ամիս առաջ նույն բանն էր, այսինքն՝ կոտրված էր կայքը: Սա «DDoS հարձակում» չէ, սա ուղղակի կոտրված կայք է: Այն ժամանակ ստացվեց վերականգնել, իսկ հիմա արդեն քանի ժամ է՝ չի ստացվում»:
Կայքի խմբագիրը կատարվածի մասին տեղեկացրել էր ԱԱԾ-ին ու որևէ տեղեկություն հետագա օրերին չուներ՝ ի՞նչ ընթացք է տրվել իր հաղորդմանը, և միայն Հայաստանի ժուռնալիստների միության հետևողականության շնորհիվ Ֆլորա Նախշքարյանը տեղեկացվեց, որ այդ հարցում ԱԱԾ-ն անելիք չունի, խնդրով պետք է զբաղվի ոստիկանության համապատասխան ստորաբաժանումը, և, որ դրա համար կայքի խմբագիրը ոստիկանություն հաղորդում պետք է ներկայացնի հանցագործության մասին:
Այսօր ոստիկանությունից տեղեկացանք, որ հունիսի 30-ին ժ.14:25-ին ՀՀ ոստիկանության ՔՈ գլխավոր վարչությունում «Գոլոս Արմենիի» թերթի գլխավոր խմբագիրը հաղորդում է տվել այն մասին, որ հունիսի 26-ին անհայտ անձը չպարզված եղանակով ապօրինի հասանելիություն է ստացել «Գոլոս Արմենիի» թերթի կայքի տվյալների շտեմարանին և ջնջել դրա որոշակի մասը, որի արդյունքում խափանվել է կայքի բնականոն աշխատանքը:
