Ամասիա խոշորացված համայնքի ավագանու անդրանիկ նիստում 9 կողմ, 0 դեմ ձայներով համայնքի ղեկավար է ընտրվել «Արփի Ամասիա» դաշինքի թեկնածու Ջեմմա Հարությունյանը: ՔՊ-ն, որն այս համայնքում բոլորից շատ ձայնն է ստացել, հրաժարվել է վերցնել ավագանու անդամի մանդատները՝ մտածելով, որ դրա արդյունքում տեղի կունենան նոր ընտրություններ, սակայն «Արփի Ամասիա» դաշինքը եւ ՀՀԿ-ն, վերցրել են իրենց մանդատները եւ միասին ունենալով 50 տոկոսից ավելի ձայն, համայնքապետ են ընտրել Ջեմմա Հարությունյանին:
Հատկանշական է, որ «Արփի Ամասիա» դաշինքը եւ ՀՀԿ-ն ի սկզբանե մտադիր էին կոալիցիա կազմել ՀՀԿ-ի հետ ու իշխանություն ձևավորվել՝ առանց ՔՊ-ի, այս մասին նրանք անգամ պաշտոնական հայտարարություն էին տարածել, սակայն որոշ ժամանակ անց իրավիճակը փոխվել է։
«Արփի Ամասիա» նորաստեղծ դաշինքը պատրաստակամություն էր հայտնել միավորվել ՔՊ-ի հետ՝ համայնքապետի պաշտոնում իր թեկնածուին՝ Ամասիա խոշորացված համայնքի ղեկավար Ջեմմա Հարությունյանին առաջադրելու պայմանով, սակայն ՔՊ-ն չէր համաձայնել:
Ջեմմա Հարությունյանը NEWS.am-ի հետ զրույցում նշեց, որ իր օգտին քվեարկել են ավագանու եւ իրենց խմբակցության 6 անդամները, եւ ՀՀԿ-ի երեք անդամները:
«6 մանդատ ունեցել է «Արփի Ամասիա» դաշինքը, 3 մանդատ՝ ՀՀԿ-ն: Ընտրություն է եղել, ձայներից 9-ն էլ ինձ են տվել, առանց դեմի ընտրվել եմ: Ինչ վերաբերում է ՔՊ-ի կողմից մանդատները չվերցնելուն, ես այդ հարցին չեմ կարող պատասխանել: Այո, ՔՊ-ի հետ կոալիցիա կազմելու պաշտոնական հայտարարություն տարածել էինք, բայց փաստաթղթով չէինք ֆիքսել, հետո իրենք մեզ հետ չցանկացան աշխատել: Փաստորեն, ՔՊ-ականները չեն լինելու ավագանու կազմում, իրենք իրենց 6 մանդատները չեն վերցրել: Իրենց ամբողջ ցուցակով՝ 32 անձ, հրաժարվել են»,-ասաց նա:
Նշենք, որ այս համայնքում ՔՊ-ն ստացել է 1217 ձայն, «Արփի Ամասիա» դաշինքը 1200 ձայն եւ ՀՀԿ-ն՝ 750 ձայն:
