Ինչ վերաբերում է այս ընտրություններում հաղթանակին, ապա ո՛չ ես, ո՛չ մեր թիմը որևէ կասկած չունենք, այսօր՝ մայիսի 3-ին, երիտասարդության ներկայացուցիչների հետ հանդիպման ժամանակ հայտարարել է Հայաստանի վարչապետի թեկնածու, «Ուժեղ Հայաստան» կուսակցության առաջնորդ Սամվել Կարապետյանը։

Քաղաքական գործիչը նշել է, որ բոլոր սոցիոլոգիական հարցումները ցույց են տալիս, որ «Ուժեղ Հայաստանը» լավ արդյունքներ է գրանցում։

«Եվ ես հույս ունեմ, որ ընտրությունների օրը մենք կտանենք այն բացարձակ հաղթանակը, որը ցանկանում ենք, նույնիսկ առանց կոալիցիաների։ Եթե լինի կոալիցիաներով, դա ավելի ուշ կքննարկենք, բայց այսօր նույնիսկ չենք ուզում քննարկել այդ հարցը, որովհետև մեզ անհրաժեշտ են լուրջ մոտիվացիա, հավատ, հաղթանակի համար պայքար, վստահություն, որ մենք կհաղթենք։ Նրանք ոչինչ չեն կարող անել, որովհետև արդեն 10 ամիս ամեն ինչ անում են, բայց ոչնչի չեն հասնում, նույնիսկ Գոհարին են ձերբակալել, բայց ոչնչի չեն հասել։ Մենք դա գիտենք, որովհետև ունենք մարտական թիմ, անվախ թիմ, թիմ, որը պայքարում է հաղթանակի համար, և եթե նրանք հանկարծ նման անհեթեթ քայլերի դիմեն, դա լուրջ հետևանքներ կունենա։ Դուք մեզ լրջորեն կօգնեք», - ասել է կուսակցության առաջնորդը։