Գերմանիայի կանցլեր Ֆրիդրիխ Մերցը չեղարկել է հաջորդ շաբաթ նախատեսված այցը Նյու Յորք՝ ՄԱԿ-ի Գլխավոր ասամբլեային մասնակցելու համար, քանի որ նրա ներկայությունն անհրաժեշտ է Բեռլինում, հաղորդում է dpa գործակալությունը՝ հղում անելով կառավարական շրջանակներին։

Որոշումն ընդունվել է կանցլերի վրա աճող ճնշման ֆոնին՝ նրա պահպանողական Քրիստոնեա-դեմոկրատական միության (ՔԴՄ) սեպտեմբերի 6-ին Արևելյան Գերմանիայի Սաքսոնիա-Անհալտ երկրամասում կայացած ընտրություններում ծանր պարտությունից հետո։ «Այլընտրանք Գերմանիայի համար» (AfD) կուսակցությունը ստացել է ձայների գրեթե բացարձակ մեծամասնություն՝ զգալիորեն առաջ անցնելով ՔԴՄ-ից։

Այժմ Մերցին սպասում է ևս երկու բարդ տարածաշրջանային քվեարկություն։ Կիրակի ընտրություններ կանցկացվեն Արևելյան Գերմանիայի Մեկլենբուրգ-Առաջավոր Պոմերանիա երկրամասում և Բեռլինում։

Նախնական կանխատեսումները ցույց են տալիս ՔԴՄ-ի պատմականորեն ցածր արդյունք Մեկլենբուրգ-Առաջավոր Պոմերանիայում։ Բեռլինում կուսակցությունը, որը գլխավորում է քաղաքի ներկայիս իշխող կոալիցիան, գրեթե հավասար ընթանում է «Ձախեր» կուսակցության հետ։ AfD-ն երրորդ տեղում է և նույնպես քիչ է զիջում առաջատարներին։

Սաքսոնիա-Անհալտում ընտրությունների արդյունքները լուրջ հարված են հասցրել Մերցի դիրքերին։ Այնտեղ AfD-ն կտրուկ աճ է արձանագրել աջակցության մեջ և գրեթե մեծամասնություն նվաճել, մինչդեռ կանցլերն ինքը ՔԴՄ-ի պարտությունն անվանել է վերջին տասնամյակների ամենածանրերից մեկը։ Միևնույն ժամանակ Մերցը հայտարարել է, որ մտադիր չէ հրաժարվել տնտեսական բարեփոխումների կուրսից։

Կառավարության համար խնդիրների լրացուցիչ աղբյուր են դարձել բենզինի բարձր գները, որոնք հատկապես ցավոտ են բազմաթիվ գերմանացի ավտոմոբիլիստների համար։ ՔԴՄ-ի և իշխող կոալիցիայի կրտսեր գործընկերոջ՝ Գերմանիայի սոցիալ-դեմոկրատական կուսակցության միջև նույնպես պահպանվում են տարաձայնություններ՝ ֆինանսական դժվարություններ ունեցող վարորդներին աջակցելու միջոցների վերաբերյալ։