նախընտրելի դարձնել
Վրաստանում կոչ են արել ստուգել Պատրիարք Իլիա Երկրորդի հուղարկավորության ծախսերը՝ պետական միջոցների օգտագործման հետ կապված հնարավոր կոռուպցիոն սխեմաների վերաբերյալ մեղադրանքներից հետո, հայտնում է Грузия Online-ը։
Ուշադրության կենտրոնում է հայտնվել մշակույթի նախկին նախարար Թիկա Ռուխաձեն, որի գերատեսչությունը հուղարկավորության կազմակերպման համար ստացել էր 3 միլիոն լարի։
«Վրաստանի մշակույթի պալատ» կազմակերպության ղեկավար Դավիթ Օքիտաշվիլին դիմել է Գլխավոր դատախազություն և Պետական աուդիտի ծառայություն՝ կոչ անելով ստուգել ծախսերը և հրապարակել տեղեկատվություն այն մասին, թե ուր են ուղղվել հատկացված միջոցները։
«Պիրվելի» հեռուստաընկերությանը տված հարցազրույցում նա Ռուխաձեին մեղադրել է պաշտոնեական դիրքի հնարավոր չարաշահման մեջ և պահանջել պարզաբանել, թե ինչի վրա են ծախսվել միլիոնավոր լարիները։
Կառավարող «Վրացական երազանք» կուսակցության պատգամավոր Թենգիզ Շարմանաշվիլին հայտարարել է, որ դատախազությունը պետք է ստուգի Օքիտաշվիլիի պնդումները, պարզի, թե ինչ ապացույցների է նա տիրապետում, և հիմքերի առկայության դեպքում հարցաքննի նախկին նախարարին։ Նրա խոսքով՝ անհրաժեշտ է սպասել օրենքով նախատեսված ընթացակարգի արդյունքներին։
«Վրաստանի համար» կուսակցության ներկայացուցիչ Գիգա Պարուլավան, իր հերթին, հայտարարել է, որ լիովին հավանական է համարում միջոցների ծախսման ընթացքում հնարավոր կոռուպցիան՝ վկայակոչելով պետական միջոցների հափշտակման այլ ենթադրյալ դեպքերը։ Այդուհանդերձ, նա ևս ապացույցներ չի ներկայացրել պատրիարքի հուղարկավորության ծախսերի գործով։
Վրացական ԶԼՄ-ների տվյալներով՝ մարտի 20-ին Ֆինանսների նախարարությունը վեց գերատեսչությունների ընդհանուր առմամբ հատկացրել է 5,588 միլիոն լարի՝ Իլիա Երկրորդի հուղարկավորությունը կազմակերպելու համար։ Այդ գումարից 3 միլիոն լարին նախատեսված էր Մշակույթի նախարարության համար, որն այն ժամանակ ղեկավարում էր Ռուխաձեն։
