նախընտրելի դարձնելԱյսօր` հունիսի 6-ին, տեղի է ունեցել Մարդու իրավունքների պաշտպանի աշխատակազմի Լոռիի տարածքային գրասենյակի պաշտոնական բացումը: Միջոցառմանը մասնակցել են Հայաստանի մարդու իրավունքների պաշտպան Կարեն Անդրեասյանը, Հայաստանում ԵՄ պատվիրակության ղեկավար, դեսպան Տրայան Հրիսթեան, ԵԱՀԿ երեւանյան գրասենյակի ղեկավար, դեսպան Անդրեյ Սորոկինը:
«Դրական եմ գնահատում մարզային գրասենյակների ստեղծումը: Ուրախ եմ, որ Եվրոպական միության ֆինանսական օժանդակությամբ եւ ԵԱՀԿ երեւանյան գրասենյակի աջակցությամբ այսօր Հայաստանում գործում են Մարդու իրավունքների պաշտպանի մարզային վեց գրասենյակները: Այնուամենայնիվ, մեծ հույսեր ունեմ, որ մոտ ապագայում մարզային գրասենյակներին ֆինանսապես կօժանդակի նաեւ մեր պետությունը»,- ասել է Պաշտպան Կարեն Անդրեասյանն իր ելույթում:
ԵՄ պատվիրակության ղեկավար, դեսպան Հրիսթեան, իր հերթին, նշել է. «Մարդու իրավունքների պաշտպանությունը ընտրությունների ընթացքում երաշխավորելուն զուգահեռ` մարզային վեց գրասենյակները հանդես են գալու, որպես Մարդու իրավունքների պաշտպանի կենրոնական գրասենյակի` մարդու իրավունքների «ներկայացուցչական գրասենյակներ»:
«Մարզային գրասենյակների հիմնադրմամբ Մարդու իրավունքների պաշտպանի գրասենյակն առավել հասանելի կդառնա մարզերի բնակիչների համար եւ կաջակցի մարդու իրավունքների պաշտպանությանը, ինչը շատ կարեւոր է հատկապես ընտրությունների շրջանում»,- իր ելույթում ընդգծել է ԵԱՀԿ երեւանյան գրասենյակի ղեկավար, դեսպան Սորոկինը:
ՄԻՊ-ի տարածքային գրասենյակներ արդեն գործում են 5 այլ մարզկենտրոններում. Գավառ, Իջեւան, Գյումրի, Եղեգնաձոր, Կապան: Յուրաքանչյուր գրասենյակ ունի երեք աշխատակից, որոնցից երկուսն իրավաբաններ են, իսկ երրորդը՝ համակարգում է գրասենյակի աշխատանքը: Գրասենյակները հագեցած են համապատասխան տեխնիկայով, ինչպես նաեւ մեքենաներով` մարդու իրավունքների հնարավոր ոտնահարման դեպքերի պատշաճ արձագանքումն ապահովելու համար:
Մարզային գրասենյակների երկամսյա գործունեությունը հեռավոր մարզերի բնակիչներին հնարավորություն է տվել առանց մայրաքաղաք ժամանելու իրենց իրավունքների խախտման դեպքերի մասին հայտնել Պաշտպանի աշխատակազմին, մասնավորապես ընտրությունների շրջանում:
Գրասենյակները նաեւ համագործակցում են տեղական իրավապաշտպան կառույցների, հասարակական կազմակերպությունների հետ` մոտ ապագայում մարդու իրավունքների ոլորտին առնչվող թեմաների շուրջ համատեղ ծրագրեր իրականացնելու նպատակով:
Մարզային գրասենյակների գործարկմանն աջակցել է ԵԱՀԿ երեւանյան գրասենյակը Եվրոպական միության կողմից տրամադրած ֆինանսական օժանդակությամբ` «Աջակցություն Հայաստանում երկու ընտրական փուլերին» ծրագրի շրջանակներում:
Մարզային գրասենյակների հասցեները.
Լոռիի մարզ
Ք. Վանաձոր, Գր. Լուսավորիչ 54ա/1
հեռ.` (093)-75-63-85
Շիրակի մարզ
ք.Գյումրի, Մհեր Մկրտչյան փող., 44շ., 46բն.
հեռ.` (0 312) 41 981
Գեղարքունիքի մարզ
ք.Գավառ, Ազատության 17/2
հեռ.` (0 264) 30 116
Վայոց Ձորի մարզ
ք. Եղեգնաձոր
Վայքի փող., թիվ 5
հեռ.` (093)-22-11-44
Սյունիքի մարզ
ք. Կապան, Մելիք Ստեփանյան 6
հեռ.` (093)-88-71-71
Տավուշի մարզ
ք. Իջեւան, Երեւանյան փողոց 156
հեռ.` (077)-71-30-08
