Երեւանի քաղաքապետ Տարոն Մարգարյանը ընդունել է «Ոսկե ծիրան» միջազգային կինոփառատոնի շրջանակում Երեւան այցելած Էլեոնորա Գուերային եւ նրան ուղեկցող գործընկերներին: Ողջունելով հյուրերին քաղաքապետը նախ իր հարգանքն է հավաստել հանրահայտ սցենարիստ, բանաստեղծ, նկարիչ եւ քանդակագործ Տոնինո Գուերայի հիշատակին եւ վստահեցրել է նրա տիկնոջը, որ Գուերայի, որպես նաեւ հայ ազգի բարեկամի, մասին հիշողությունները երկար կմնա հայ ժողովրդի հուշերում:

Այնուհետ Տարոն Մարգարյանը համառոտ ներկայացրել է մայրաքաղաքի պատմությունը եւ նշել, որ Երեւանն այսօր բավականին դինամիկ զարգացող քաղաք է ու քաղաքային իշխանություններն էլ իրենց լիազորությունների շրջանակում անում են հնարավորը քաղաքն առավել ժամանակակից, հարմարավետ ու ներկայանալի դարձնելու ուղղությամբ:

«Երեւանն այսօր զարգացման իրապես մեծ ներուժ ունի, ինչը հաշվի առնելով մենք որդեգրել ենք գործընկերների հետ փոխգործակցության ընդլայնման բաց ու պատրաստակամ աշխատաոճ: Ներդրումային ցանկացած առաջարկ, որը կարող է նպաստել մայրաքաղաքի համաչափ զարգացմանը, ողջունվում եւ մեր լիազորությունների շրջանակում ստանում է համապատասխան աջակցություն», նշել է քաղաքապետը:

Շնորհակալություն հայտնելով ջերմ ընդունելության եւ Տոնինո Գուերայի հիշատակը հարգելու համար, Էլեոնորա Գուերան իր հերթին նշել է, որ իսկապես տպավորված է Երեւանի թե ճարտարապետական տեսքով եւ թե երեւանցիների ջերմ հյուրընկալությամբ ու քաղաքային կոլորիտով: Հիացմունք արտահայտելով մայրաքաղաքի ինքնատիպ շատրվանների մասին, տիկին Գուերան նշել է, որ իր ամուսինը հայտնի է եղել նաեւ իր հեղինակած շատրվանների նախագծերով եւ հույս է հայտնել, որ դրանցից մեկն էլ կարող է կառուցվել Երեւանում:

Տոնինո Գուերայի շատրվանային նախագծերի իրագործող ինժեներ-ճարտարապետ Ռիտա Ռոնկոնին, ով եւս ներկա էր հանդիպմանը, քաղաքապետ Տարոն Մարգարյանին է ներկայացրել Գուերայի նախագծերով արդեն կառուցված շատրվանների լուսանկարներով ալբոմը:

Ծանոթանալով իրագործված նախագծերին Տարոն Մարգարյանը առաջարկել է Երեւանի գլխավոր ճարտարապետի հետ քննարկել Գուերայի հեղինակած շատրվանային նախագծերն ու ավելի հստակ առաջարկ ներկայացնել քննարկման: