նախընտրելի դարձնելՀայաստանի վարչապետ Տիգրան Սարգսյանն այցելել է Շիրակի մարզ` «Գյումրու սելեկցիոն կայան» ՓԲԸ-ում 2011-2012 թթ. ընթացքում իրականացված գյուղատնտեսական աշխատանքներին ծանոթանալու նպատակով:
Կառավարության մամուլի ծառայությունից հայտնում են, որ վարչապետն այցելել է հացահատիկի բերքահավաքի եւ գյուղատնտեսական մշակաբույսերի սորտափորձարկումների համար կատարված ցանքատարածություններ, շրջել կայանի տարածքով եւ ագրոլաբորատորիայով, ծանոթացել արտադրական գործընթացին եւ աշխատանքային պայմաններին: «Գյումրու սելեկցիոն կայան» ՓԲԸ-ի տնօրեն Ռուբիկ Կարախանյանը ՀՀ վարչապետին է ներկայացրել հացահատիկի բերքահավաքի, աշնանացան ցորենի էլիտային եւ առաջին վերարտադրության սերմացուներով ցանքերի աշխատանքների ընթացքը:
Այնուհետեւ վարչապետ Սարգսյանն աշխատանքային խորհրդակցություն է անցկացրել ՀՀ կառավարության անդամների եւ ՀՀ մարզպետների մասնակցությամբ` նշելով. ««Գյումրու սելեկցիոն կայանի» զարգացումը եւ կայացումը մեզ համար էական նշանակություն ունի, որպեսզի կարողանանք Հայաստանի Հանրապետության բոլոր մարզերում արդիականացնել սերմացուն»:
Օրակարգի առաջին հարցով «Գյումրու սելեկցիոն կայանի» տնօրենը զեկուցել է կատարվող գյուղատնտեսական մշակաբույսերի սորտափորձարկումների ընթացքի եւ արդյունքների մասին եւ տեղեկացրել, որ սելեկցիոն-սերմնաբուծական աշխատանքները ժամանակակից չափանիշներին համապատասխան իրականացնելու համար կայանը համագործակցում է աշխարհի լավագույն` «ԻԿԱՐԴԱ», «ՍԻՄՄԻՏ», Ռուսաստանի Դաշնության, Ուկրաինայի եւ Խորվաթիայի սելեկցիոն կենտրոնների հետ: Նա նշել է, որ «Գյումրու սելեկցիոն կայանը» զբաղվում է հացահատիկային մշակաբույսերի (աշնանացան, գարնանացան ցորենների, գարու), բազմամյա խոտաբույսերի (առվույտ, կորնգան), բանջարանոցային մշակաբույսերի (կաղամբ, գազար, սեղանի ճակնդեղ), հատիկաընդեղենների (լոբի, ոսպ, սիսեռ), ինչպես նաեւ այլ դաշտային մշակաբույսերի սելեկցիայով եւ սերմնաբուծությամբ: 2012 թ. համար հացահատիկային մշակաբույսերի սպասվելիք համախառն բերքը կանխատեսվում է 9400 ցենտներ` 2011 թ. 7100 ցենտների համեմատ: Տիգրան Սարգսյանը հանձնարարել է ՀՀ գյուղատնտեսության նախարարությանը հավասարաչափ բաշխել բարձր վերարտադրության սերմերը` ըստ մարզերի տնտեսությունների:
Հաջորդիվ ՀՀ գյուղատնտեսության նախարարի տեղակալ Սամվել Գալստյանը զեկուցել է 2012 թ. աշնան եւ 2013 թ. համար ՀՀ մարզերում աշնանացան ցորենի առաջին վերարտադրության, գարնանացան գարու, եգիպտացորենի, առվույտի, կորնգանի սերմացուների, պարարտանյութի եւ դիզելային վառելանյութի` ՀՀ մարզպետարաններից ներկայացված անհրաժեշտ պահանջարկի մասին: Արծարծվել է նաեւ ՀՀ գյուղատնտեսության, էներգետիկայի եւ բնական պաշարների նախարարությունների միջեւ ստորագրված համաձայնագրով «Վանաձոր Քիմպրոմ» ՍՊԸ-ի կողմից պարարտանյութերի տեղական արտադրության, մասնավորապես, պարարտանյութերի գների, քանակների եւ դրանց իրացման հարցը, որի վերաբերյալ մանրամասներ է ներկայացրել ՀՀ էներգետիկայի եւ բնական պաշարների նախարար Արմեն Մովսիսյանը:
Ամփոփելով քննարկման արդյունքները` վարչապետը համապատասխան հանձնարարականներ է տվել ՀՀ գյուղատնտեսության նախարարությանը` արձանագրված խնդիրները մասնագետների հետ քննարկելու եւ սեղմ ժամկետներում դրանց լուծման տարբերակները ներկայացնելու համար:
