Դելիի ավտոբուսում դաժանաբար բռնաբարված ուսանողուհին մահացել է Սինգապուրի «Մաունթ Էլիզաբեթ» հիվանդանոցում: «Հիվանդը մահացել է դեկտեմբերի 29-ի առավոտյան ժամը 04:45-ին», - ասվում է հիվանդանոցի հաղորդագրության մեջ: 23-ամյա ուսանողուհին Սինգապուր էր տեղափոխվել դեկտեմբերի 27-ին՝ Դելիում երեք վիրահատության ենթարկվելուց հետո: 

Ըստ հիվանդանոցի գլխավոր բժշկի` ծանր վնասվածքների հետեւանքով խախտվել էր ներքին օրգանների աշխատանքը: Հաղորդվում է, որ նախքան հիվանդանոց  հասնելը նրա սիրտը մեկ անգամ կանգ էր առել, բացի այդ վնասված են  եղել ուղեղը, թոքերը եւ որովայնի հատվածը: 

Տուժածի հարազատների հետ միասին հիվանդանոցում են եղել նաեւ Հնդկաստանի իշխանությունների ներկայացուցիչները:

Այժմ աղջկա մարմինը հայրենիք ուղարկելու նախապատրաստություններ են ընթանում, հայտնում է  BBC-ի ռուսական ծառայությունը: 

Դեկտեմբերի 16-ին կատարված հանցագործությունը  խուճապ էր առաջացրել ողջ Հնդկաստանում:

Դելիում զանգվածային ցույցեր են տեղի ունեցել, ոստիկանության հետ բախման հետեւանքով մահացել է մեկ իրավապահ:

Բռնաբարության մասնակցության կասկածանքով ձերբակալվել է վեց տղամարդ, երկու ոստիկան էլ հեռացվել են աշխատանքից: 

Հանցագործությունը տեղի էր ունեցել, երբ 23-ամյա ուսանողուհին եւ նրա ընկերը որոշել են կինո գնալ, Մունիրկա թաղամասում նստել են ավտոբուս: Ըստ ոստիկանության` աղջկա եւ նրա ընկերոջ վրա հարձակվել են վեց տղամարդ, նրանք մեկ ժամվա ընթացքում բռնաբարել են աղջկան, հետո նրան ու ընկերուը ծեծել երկաթե ձողերով եւ նետել ընթացող ավտոբուսից:   Երկրի կառավարությունը փորձում է հանդարտեցնել ժողովրդական հուզումները՝ հայտարարելով, որ մի շարք միջոցներ կձեռնարկվեն Դելիում կանանց անվտանգությունն ապահովելու համար: Կառավարությունը մտադիր է նաեւ հատուկ կայքում հրապարակել  բռնաբարության համար դատապարտվածների անունները, լուսանկարները եւ հասցեները, որպեսզի «խայտառակի նրանց»: