նախընտրելի դարձնել
Ուկրաինայի անվտանգության ծառայության (СБУ) ղեկավար Ալեքսանդր Պոկլադը պաշտոնից ազատել է գերատեսչության երկու բարձրաստիճան աշխատակցի, որոնք անցնում են «Կարթագեն» գործողության շրջանակում Ուկրաինայի ազգային հակակոռուպցիոն բյուրոյի (НАБУ) վարած քննությամբ, հայտնում է РБК-Украина-ն։
Գերատեսչությունում հայտարարել են, որ լիակատար աջակցություն են ցուցաբերում քննությանը և նպաստում բոլոր անհրաժեշտ դատավարական գործողությունների իրականացմանը։
Պոկլադն ընդգծել է, որ Ուկրաինայի անվտանգության ծառայությունը շահագրգռված է թափանցիկ, օբյեկտիվ և անաչառ քննությամբ։ Ըստ նրա՝ գերատեսչությունը կառուցողականորեն համագործակցում է Ուկրաինայի ազգային հակակոռուպցիոն բյուրոյի և Մասնագիտացված հակակոռուպցիոն դատախազության ղեկավարության հետ։
Բացի դրանից, Ուկրաինայի անվտանգության ծառայության ղեկավարը կապ է պահպանում գործընկեր երկրների հատուկ ծառայությունների ներկայացուցիչների հետ՝ բացահայտված հանցագործությունների քննությունն այլ իրավազորություններում ևս ապահովելու համար։
Պոկլադն առանձին դիմել է գործով անցնող՝ «Մեքսիկացի» մականունով հայտնի անձին՝ առաջարկելով նրան կամավոր վերադառնալ Ուկրաինա և հանձնվել իրավապահ մարմիններին։
«Հակառակ դեպքում մենք ինքներս կգտնենք նրան, որտեղ էլ որ թաքնվի։ Փորձ ունենք։ Ուկրաինայի անվտանգության ծառայությունն աշխատում է և աշխատելու է միայն Ուկրաինայում»,- հայտարարել է գերատեսչության ղեկավարը։
Ավելի վաղ Ուկրաինայի ազգային հակակոռուպցիոն բյուրոն հրապարակել էր խոսակցությունների ձայնագրություններ, որոնք, ըստ քննության վարկածի, վկայում են նոր հանցավոր կազմակերպության գործունեության մասին. այն ապօրինի օգուտ է տրամադրել իրավապահ մարմինների պաշտոնատար անձանց։ Բյուրոյի տվյալներով՝ ենթադրյալ սխեմայում ներգրավված են եղել Ուկրաինայի անվտանգության ծառայության, Ազգային ոստիկանության և Ուկրաինայի գլխավոր դատախազի գրասենյակի գործող աշխատակիցներ։
«Կարթագեն» գործողության շրջանակում Ուկրաինայի ազգային հակակոռուպցիոն բյուրոյի աշխատակիցները ձերբակալել են նաև Ուկրաինայի անվտանգության ծառայության ազգային պետականության պաշտպանության դեպարտամենտի պետի առաջին տեղակալ, գեներալ Սերգեյ Դուկային։
