Լոռու մարզի ընդհանուր իրավասության դատարանում՝ դատավոր Մուշեղ Հարությունյանի նախագահությամբ, շարունակվում է Ստեփան Անտոնյանի եւ Գոհար Ղազոյանի նկատմամբ հարուցված քրեական գործի դատաքննությունը: Այս մասին հաղորդում է «Փաստինֆո» գործակալությունը: Վերջիններս մեղադրվում են խոշոր եղջերավոր անասուններ արածացնելու պատճառով առաջացած վեճի ժամանակ միմյանց հարվածելու մեջ:

Ստեփան Անտոնյանին մեղադրանք է առաջադրվել այն բանի համար, որ նա 2012թ. հոկտեմբերի 17-ին խոշոր եղջերավոր անասունները արածացնելու պատճառով առաջացած վեճի ժամանակ ձեռքով եւ ձեռնափայտով հարվածել է Ղազոյանի գլխին` պատճառելով թեթեւ վնաս: Գոհար Ղազոյանին մեղադրանք է առաջադրվել այն բանի համար, որ նա վիճաբանել է Անտոնյանի հետ, ապտակել նրան եւ ձեռնափայտով հարվածել, պատճառելով թեթեւ վնասի հատկանիշ չպարունակող մարմնական վնասվածք:

Ստեփան Անտոնյանը մեղադրվում է ՀՀ քրեական օրենսգրքի 117-րդ հոդվածով, իսկ Գոհար Ղազոյանը 117-րդ եւ 118-րդ հոդվածներով: Նրանց նկատմամբ խափանման միջոց է ընտրվել չհեռանալու մասին ստորագրությունը: Հաջորդ դատական նիստը նշանակված է հունվարի 14-ին:

Լուսանկարն՝ Էդվարդ Արզումանյանի/NEWS.am