նախընտրելի դարձնել
Այսօր` հունվարի 9-ին Լեռնային Ղարաբաղի Հանրապետության Ազգային ժողովի նիստերի փոքր դահլիճում տեղի է ունեցել արցախահայության ազգային-ազատագրական պայքարի՝ Ղարաբաղյան շարժման 25-րդ տարեդարձի տոնակատարության պետական հանձնաժողովի հերթական նիստը։
ԼՂՀ ԱԺ մամուլի ծառայությունից հայտնում են, թե նիստի աշխատանքը վարել է Ազգային ժողովի նախագահ, պետական հանձնաժողովի նախագահ Աշոտ Ղուլյանը։
Ի կատարումն նախորդ նիստում ձեռք բերված պայմանավորվածության եւ տրված հանձնարարականի` հանձնաժողովի անդամները ներկայացրել են տոնակատարության միջոցառումների համալիր ծրագրի մշակման համար նախատեսված իրենց գրավոր առաջարկությունները։
Տեղի է ունեցել մտքերի փոխանակություն ներկայացված առաջարկությունների շուրջ, որի ընթացքում հնչել են տարաբնույթ տեսակետեր։ Արդյունքում ամբողջացվել եւ նիստի մասնակիցների ուշադրությանն է ներկայացվել տոնական միջոցառումների ծրագրի նախնական տարբերակը։
Քննարկելով այն՝ հանձնաժողովը նպատակահարմար է գտել առաջիկա նիստում վերստին անդրադառնալ ծրագրի նախագծին՝ նախատեսված միջոցառումների բեմագրի համաձայնեցման եւ նոր առաջարկությունների ներկայացման պարագայում այն համալրելու համար։
Տրվել են կազմակերպչական բնույթի հանձնարարականներ։
