Լոս Անջելեսում անցած կիրակի օրը` փետրվարի 10-ին, 1988-ի դեկտեմբերի 7-ի երկրաշարժի 25-րդ տարելիցին նվիրված հեռուստամարաթոն-դրամահավաք է տեղի ունեցել: Հեռուստամարաթոնը 11 ժամ շարունակ, Լոս Անջելեսի ժամանակով առավոտյան ժամը 11-ից մինչեւ երեկոյան ժամը 10-ը, ուղիղ եթերում հեռարձակվել է տեղի AMGA հեռուստակայանի երեք ալիքներով: Այն կազմակերպել էին «AMGA» հեռուստաընկերությունը, բարերար Էլվիս Մադաթյանը, հեռուստալրագրողներ Արմեն Բարսեղյանն ու Ռուդիկ Հովսեփյանը, «Համայնապատկեր» ամսագրի գլխավոր խմբագիր Սարո Գյոդակյանը: Ինչպես հեռուստամարաթոնի ընթացքում, այնպես էլ հետագայում հանգանակված գումարը «Շիրակ կենտրոնի» միջոցով ծախսվելու է Գյումրու տնակային ավաններում բնակվող ընտանիքների առաջնային խնդիրների լուծման նպատակով: Գումարից զատ, բազմաթիվ անհատների կողմից տրամադրված նյութական օգնությունը եւս հատկացվելու է «Շիրակ կենտրոնի» տեսանյութերում ներկայացված անօթեւան ընտանիքներին:

Դրամահավաք-մարաթոնին ակտիվ մասնակցություն են ցուցաբերել Գլենդելում բնակվող հայ համայնքի ավելի քան 700 անդամներ, ելույթ ունեցել եւ գյումրեցի անօթեւան ընտանիքներին օգնելու կոչով հեռուստադիտողներին են դիմել տասնյակ մտավորականներ, երգիչներ:

Հեռուստամարաթոնի առաջին օրը հանգանակվել է մոտ 40 000 դոլար: Նախաձեռնողների հավաստիացումներով, դրամահավաքն ի աջակցություն Գյումրիի տնակային ավաններում բնակվող ընտանիքների կրելու է երկարաժամկետ բնույթ եւ տեւելու է մինչեւ ընթացիկ տարվա դեկտեմբերի 7-ը:

«Շիրակ կենտրոնը» գյումրեցի հարյուրավոր անօթեւան եւ սոցիալապես ծանր պայմաններում բնակվող ընտանիքների անունից իր խորին երախտագիտությունն է հայտնում հեռուստամարաթոնի եւ դրամահավաքի կազմակերպիչներին: