ՆախընտրելիՂարաբաղյան հակամարտության կարգավորման գործընթացում հայկական կողմի դիրքերն ամուր են եւ, փառք Աստծո, համահունչ են ԵԱՀԿ Մինսկի խմբի դիրքորոշմանը: Այս մասին հայտարարեց Հայաստանի նախագահ, նախագահի թեկնածու Սերժ Սարգսյանը` Երեւանի Կենտրոն վարչական շրջանում քարոզարշավի վերջին օրը` փետրվարի 16-ին ընտրողների հետ հանդիպմանը:
Պատասխանելով հարցին, թե ինչ ծրագրեր նա շատ կցանկանար իրականացնել, բայց չի արել, նախագահն ասաց, որ ցանկանում էր Ղարաբաղի հարցով բանակցությունները նորմալ հուն վերադարձնել, եւ անմիջապես էլ ավելացեց` «կարծում եմ, դա մեզ հաջողվեց»:
«Ասում եմ մեզ, քանի որ դա միայն իմ աշխատանքը չէ. աշխատել է մի ողջ թիմ: Բանակցությունների շատ կարեւոր փուլում մեկուկես տարի առաջ Ադրբեջանը հրաժարվեց ԵԱՀԿ Մինսկի խմբի համանախագահների առջարկություններից: Մենք ասացինք, որ փաստաթուղթը մեր երազանքների արտահայտությունը չէ, բայց այն մեզ հնարավորություն է տալիս արժանապատվորեն ավարտել պայքարի փուլը: Ադրբեջանի համար եթե շահավետ լինեին առաջարկությունները, նրանք կստորագրեին փաստաթուղթը»,-սաաց նա: Նախագահի խոսքով` հայկական կողմերի դիրքերն ամուր են եւ, փառք Աստծո, համահունչ ՄԽ դիրքորոշմանը: «Սա մեծ ձեռքբերում է: Զինվորների արիության եւ բարձր մարտական ոգու շնորհիվ մեր սահմաններն անխախտ են»,-ասաց նա:
Խոսելով այն մասին, թե ինչպիսին կլինեն Հայաստանի ձեռքբերումները 20 տարի անց, Ս. Սարգսյանը վստահություն հայտնեց, որ 2033 թ-ին ղարաբաղյան խնդիրը լուծված կլինի, Հայաստանը կդառնա եվրոպական երկիր` փոքր, բայց զարգացած, սոցիալական խնդիրները լուծված կլինեն:
