նախընտրելի դարձնելՇոտլանդիայի կաթոլիկ եկեղեցու նախկին ղեկավար, Էդինբուրգի եւ Սենթ Էնդրյուսի արքեպիսկոպոս, կարդինալ Քիթ Օ’Բրայենը, ով նախկինում մեղադրվել է սեռական ոտնձգությն համար, խոստովանել է «սեռական բնույթի արարքներ» կատարելու փաստը եւ ներողություն խնդրել դրանց համար:
Իր հայտարարությունում նա խոստովանում է, որ իր «սեռական վարքը հոգեւորականից, արքեպիսկոպոսից եւ կարդինալից սպասվող վարքի ստանդարտներից ցածր է եղել»: Կարդինալը խոստանում է իր մնացած կյանքը միայնության մեջ եւ որեւէ դեր չխաղալ Շոտլանդիայի կաթոլիկ եկեղեցու հանրային կյանքում: Միաժամանակ Օ’Բրայենը չի հստակեցնում, թե կոնկրետ ինչ արարքների մասին է խոսքը, հաղորդում է Vesti.ru-ն:
Ավելի վաղ NEWS.am-ը հայտնել էր, որ Կարդինալ Քիթ Օ`Բրայենը՝ Մեծ Բրիտանիայի կաթոլիկ եկեղեցու ամենաբարձրաստիճան ներկայացուցիչը, լքել է Սենտ Էնդրյուսի եւ Էդինբուրգի արքեպիսկոպոսի պաշտոնն այն բանից հետո, երբ մեղադրվել է 1980-ականներին երիտասարդ հոգեւորականների հանդեպ անվայել պահվածքի համար:
Ըստ փորձագետների` կարդինալի անհապաղ հրաժարականը թելադրված էր նոր Հռոմի Պապ ընտրելիս կաթոլիկ եկեղեցին նոր սադրանքներից պաշտպանելու ցանկությամբ: Սենտ Էնդրյուսի եւ Էդինբուրգի արքեպիսկոպոսը պետք է լիներ բրիտանացի միակ ներկայացուցիչը Վատիկանում: Փետրվարի 25-ին հրապարակված հայտարարությունում կարդինալը հայտնել էր, որ այլեւս չի մասնակցի ժողովին, եւ որ Բենեդիկտոս XVI –ն ընդունել է իր հրաժարականը: Այժմ Հռոմի պապը պետք է թեմի կառավարման համար ադմինիստրատոր նշանակի` մինչեւ նոր արքեպիսկոպոսի նշանակումը, հայտնում է BBC-ի ռուսական ծառայությունը:
Օրերս հայտնի էր դարձել, որ փետրվարի սկզբին երեք հոգեւորականները Մեծ Բրիտանիայում Պապի ներկայացուցչին բողոքել էին իրենց նկատմամբ կարդինալ Օ’Բրայենի անվայել պահվածքի դեմ: Նրանց բոլոր մեղադրանքները վերաբերում են 1980-ականներին:
Նախկին հոգեւորականը պատմել է, որ 1980թ. ճեմարանական է եղել: Կարդինալն իր նկատմամբ անվայել վարք է դրսեւորել գիշերային աղոթքից հետո: Այդ մարդը պաշտոնից հեռացել էր Կիտ Օ’Բրայենի եպիսկոպոս դառնալուց անմիջապես հետո: Եվս մեկ բողոքի հեղինակ հայտնել էր, որ 30 տարի առաջ իրեն այցելել էր Կիտ Օ’Բայանը, եւ իրենց միջեւ «անվայել կապ է տեղի ունեցել»: Երրորդ բողոքի հեղինակը գրում է, որ կարդինալի անվայել պահվածքին բախվել է երեկոյան ընթրիքից հետո:
BBC-ի թղթակից Ռոբերտ Պիգոտը նշում է, որ Կիտ Օ’Բրայանը պատմություն կմտնի որպես հղիությունների ընդհատման, էվթանազիայի եւ միասեռականության նկատմամբ ավանդական կաթոլիկ հայցքների վառ պաշտպան: Կարդինալը հայտարարել էր, որ կաթոլիկ հոգեւորականները ցանկության դեպքում պետք է ամուսնանալու հնարավորություն ունենան:
