նախընտրելի դարձնելՀայաստանի ԱԺ նախագահ Հովիկ Աբրահամյանը շնորհավորական ուղերձ է հղել աշխարհահռչակ երգիչ, Շվեյցարիայում Հայաստանի դեսպան Շառլ Ազնավուրին՝ ծննդյան օրվա առթիվ:
Ուղերձում ասվում է.
«Հարգարժան պարոն Ազնավուր, սիրելի Մաեստրո,
ՀՀ Ազգային ժողովի եւ անձամբ իմ անունից պատիվ ունեմ շնորհավորելու Ձեզ ծննդյան 89-ամյակի առթիվ:
Աշխարհում չկա մի անկյուն, որտեղ չգնահատվի եւ չմեծարվի Ձեր արվեստը, որի միջոցով Դուք շարունակ քարոզում եք համամարդկային բարձրագույն արժեքներ՝ սեր, բարոյականություն, հանդուրժողականություն եւ համերաշխություն: Արժեքներ, որոնց պակասը, ցավոք, զգացվում է հատկապես մեր օրերում:
Աշխարհասփյուռ հայությունը հպարտ է նման արժեքների ջատագով իր հայ զավակով: Դուք արժանապատվորեն շարունակում եք մեր ազգի մեծ երախտավորների անգնահատելի ավանդը համաշխարհային քաղաքակրթության մեջ:
Առանձնահատուկ ոգեւորությամբ եմ արձանագրում մեր երիտասարդ պետականության կայացման եւ ամրապնդման գործընթացին օժանդակելու Ձեր անգնահատելի նվիրվածությունը:
Սիրելի պարոն Ազնավուր, եւս մեկ անգամ շնորհավորում եմ Ձեզ՝ մաղթելով քաջառողջություն եւ Ձեր նվիրական իղձերի իրականացում»:
