նախընտրելի դարձնելԱվստրալիայի Fairfax Radio ռադիոկայանն աշխատանքից հեռացրել է իր առաջատար հաղորդավար Հովարդ Սաթլերին՝ երկրի վարչապետ Ջուլիա Գիլարդին անվայել հարց ուղղելու պատճառով: Դիջեյը հարցրել է, թե նրա կողակիցը նույնասեռակա՞ն է:
Սաթլերն ուղիղ եթերում վարչապետի հետ զրույցի ժամանակ ենթադրել է. Թիմ Մեթիսոնը, որի հետ վարչապետն ապրում է արդեն յոթ տարի, «հավանաբար գեյ է, չէ՞ որ նա վարսավիր է»: Այդ հայտարարությունը նա արել է որոշ ասեկոսեների վրա հիմնվելով: Վարչապետը պատասխանել է, որ վերջինիս դիտարկումն անհեթեթ է: Սաթլերին հեռացրել են աշխատանքից եւ հայտարարել ներքին հետաքննություն սկսելու մասին: Ռադիոկայանը հրապարակավ ներողություն է խնդրել հաղորդավարի արարքի համար: Քննության ընթացքում ղեկավարությունը եկել է այն եզրակացությանը, որ Սաթլերի տված հարցերն անհարգալից են եղել եւ քաղաքական զրույցի հետ կապ չեն ունեցել, հաղորդում է «rbcDaily.ru»-ն:
«Վարչապետը պատասխանել է պարոն Սաթլերի հարցերին արժանապատվորեն եւ բավական համբերատար», — նշվում է ռադիոկայանի հայտարարության մեջ: Գիլարդը հայտարարել է, որ հարցն իրեն տհաճություն է պատճառել: «Ես կցանկանայի՝ աղջիկներն ու կանայք իմանային, որ կարող են ներգրավվել հասարակական կյանքում եւ քաղաքականության մեջ եւ չբախվել այնպիսի հաղորդավարների, ինչպիսին որ հարցաքննում էր ինձ երեկ », — ասել է Ավստրալիայի վարչապետը:
