ԱՄՆ-ն տարօրինակ ոչինչ չի տեսնում  այլ երկրների մասին տեղեկություններ հավաքելու մեջ: Այդպես է արձագանքել ԱՄՆ-ի պետքարտուղար Ջոն Քերրին Վաշինգթոնի կողմից ԵՄ-ի ներկայացուցչությունների գաղտնալսման լուրերի կապակցությամբ Եվրամիության վրդովմունքին:   Քերրին իր դիրքորոշումը հայտնել է Բրունեյի մամուլի ասուլիսում` ի պատասխան հանդիպման ընթացքում ԵՄ  պատվիրակության ղեկավար Քեթրին Էշթոնի հնչեցրած անհանգստությանը: Քերրին հայտնել է, որ չի կարող  պարզաբանել լուրերի մանրամասները, քանի որ դրանց ի հայտ գալու ժամանակ ինքն արտասահմանյան գործուղման  մեջ է եղել, հայտնում է «ՌԻԱ Նովոստին»:  

Քերրին նաեւ հույս է հայտնել, որ ամերիկյան հատուկ ծառայությունների նախկին գործակալ Էդվարդ Սնոուդենի հետ կապված իրավիճակը չի ազդի Վաշինգտոնի եւ Պեկինի փոխհարաբերությունների վրա:

Մինչդեռ ՄԱԿ-ի գլխավոր քարտուղարի նախկին տեղակալ Պինո Արլակին հայտնել է, որ Սնոուդենի գործի հետ կապված Եվրախորհրդարանը անթույլատրելի է համարում ԱՄՆ-ի հետ որեւէ նոր պայմանագրեր կնքելը, քանի դեռ  հավաստիացում չի տրվել ու չեն ապամոնտաժվել այն բոլոր սարքավորումները, որոնց միջոցով ԱՄՆ-ն  գաղտնալսել է քաղաքացիների անձնական խոսակցությունները:

Գերմանիայի արտգործնախարարության ներկայացուցիչ Մարտին Շեֆերը հուլիսի 1-ին հայտարարել է, որ Բեռլինում ԱՄՆ-ի դեսպանը  հրավիրվել է Գերմանիայի ԱԳՆ՝ ԱՄՆ-ի ազգային անվտանգության գործակալության կողմից Գերմանիայ եւ ԵՄ այլ երկրների քաղաքացիների էլեկտրոնային նամակագրությանը հետեւելու հարցով:

Ավելի վաղ Guardian-ը հրապարակել էր ԿՀՎ-ի նախկին աշխատակից Էդվարդ  Սնոուդենի տրամադրած փաստաթղթերի մանրամասները: 2010թ. փաստաթղթում 38 դեսպանատներ եւ դիվանագիտական առաքելություններ են նշված՝ որպես գաղտնի ծառայությունների «թիրախներ»:

Guardian. ԱԱԳ-ն գաղտնալսել է ԱՄՆ-ում 38 դիվանագիտական առաքելությունների

Հունիսի 29-ին գերմանական Spiegel հրատարակությունը, նույնպես վկայակոչելով Սնոուդենի ներկայացրած փաստաթղթերը, գրել էր, որ ԱԱԳ-ն գաղտնալսել է Վաշինգթոնում եւ Նյու Յորքում ԵՄ-ի ներկայացուցչությունները եւ կոտրել նրանց համակարգչային ցանցերը:

ԱՄՆ-ում գաղտնալսել են Վաշինգտոնում ու Նյու Յորքում ԵՄ ներկայացուցչության դիվանագետներին