նախընտրելի դարձնել
Եվրահանձնաժողովը հավանության է արժանացրել Արեւելյան գործընկերության երկրների միջին եւ փոքր բիզնեսի աջակցության 10 մլն եվրոյի ծրագիրը, ինչպես նաեւ առեւտրի զարգացման ծրագիրը:
«Մեր արեւելյան գործընկերները լրջորեն տուժել են տնտեսական ճգնաժամից: Փոքր եւ միջին բիզնեսը կարող է կարեւոր դեր ունենալ աշխատատեղերի ստեղծման եւ տնտեսական աճի հարցում, քանի որ այն արագ է ազդում շուկայի հնարավորությունների վրա: Հենց այդ պատճառով էլ փոքր եւ միջին բիզնեսի աջակցությունն Արեւելյան գործընկերության տարածաշրջանում մեզ համար կարեւոր խնդիր է»,-հայտարարել է Եվրամիության ընդլայնման հարցերով հանձնակատար Շտեֆան Ֆյուլեն:
Նոր ծրագիրը ներառում է օժանդակություն անդամ երկրներին` փոքր եւ միջին ձեռնարկատիրության աջակցությանն ուղղված օրենսդրական բարեփոխումների եւ քաղաքականության ներդրման ու իրականացման համար:
Ծրագիրը նախատեսում է նաեւ «Արեւելք –ինվեսթ» նախագծի ընդլայնում, որն ուղված է եվրոպական եւ Արեւելյան գործընկերության երկրների ընկերությունների միջեւ առեւտրի զարգացմանը:
Նշենք, որ Արեւելյան գործընկերությունում ընդգրկված են Հայաստանը, Վրաստանը, Ադրբեջանը, Ուկրաինան, Մոլդովան եւ Բելառուսը:
