նախընտրելի դարձնել
Թեքսաս նահանգում կյանքից հեռացել է աշխարհի ամենահարուստ մարդկանցից մեկը՝ հայտնի միլիարդատեր եւ բարերար, սլանցային գազի արդյունահանման ոլորտի առաջամարտիկ Ջորջ Միթչելը։
Associated Press-ը հայտնում է, որ անվանի բարերարը, որին մամուլում կոչում էին «սլանցային հեղափոխության հայր», կյանքից հեռացել է հուլիսի 26-ին Գալվեսթոնի իր տանը։ Ջորջ Միթչելը մահացել է բնական մահով, 95 տարեկան հասակում ՝ ընտանիքի մեծաթիվ անդամներով շրջապատված. Նա տասը երեխա ունի։ Նրա կինը՝ Սինտիան, մահացել էր չորս տարի առաջ։
Միթչելը հիմնադրել էր Mitchell Energy & Development Corp. ընկերությունը, որը 1980-ականներին սլանցային գազն արդյունահանելիս առաջինն էր կիրառել հիդրոճեղքման մեթոդը, ինչի շնորհիվ հնարավոր էր դառնում զգալի կրճատել սլանցային գազի ինքնարժեքը։ «Սլանցային հեղափոխության» շնորհիվ ԱՄՆ-ն բնական գազի արդյունահանման բնագավառում առաջին տեղն էր զբաղեցրել։ 2002թ. Միթչելն իր ընկերությունը 3,5 մլրդ դոլարով վաճառել է Devon Energy կոնցեռնին։
Ամերիկացիները Միթչելին հարգում էին ոչ միայն արդյունաբեական նորարարությունների, այլեւ բարեգործությունների համար։
2013թ. Forbes-ը գործարարի կարողությունը 2 մլրդ դոլար էր գնահատել, հայտնում է «Կոմսոմոլսկայա պրավդան»։
