նախընտրելի դարձնել
Հայաստանի տարածքային կառավարման նախարարին կից կոլեգիայի այսօրվա նիստում ներկայացվեց «ՀՀ տարածքային կառավարման նախարարության գործառութային վերլուծություն եւ բիզնես գործընթացների նկարագրություն» հաշվետվության առաջին մասը: ՏԿՆ հասարակայնության հետ կապերի բաժնից հայտնում են, թե ուսումնասիրության պատվիրատուն ՀՀ կառավարությունն է, այն իրականացվել է Համաշխարհային բանկի վարկային ծրագրի շրջանակում: Ծրագրի նպատակը ՀՀ պետական կառավարման համակարգի գործունեության արդյունավետության բարձրացումն է:
Աշխատանքային խմբի ղեկավար Սուսաննա Եղիազարյանը տեղեկացրել է, որ ուսումնասիրվել է նախարարության գործունեությունը կանոնակարգող իրավական դաշտը, կատարվել է հիմնական գործառույթների վերլուծություն, փաստացի իրականացվող գործընթացները համեմատվել են իրավական ակտերով նախատեսված ընթացակարգերի հետ, ինչպես նաեւ արդի իրողություններով պայմանավորված` իրավական ակտերում փոփոխությունների առաջարկներ են արվել: Նշվել է, որ աշխատանքային խումբը կշարունակի ուսումնասիրությունները եւ կներկայացնի ամբողջական հաշվետվություն` նախարարության բոլոր գործառույթների վերաբերյալ:
Փոխվարչապետն առաջարկել է ուսումնասիրության արդյունքներն ու առաջարկությունները քննարկել նախարարության ստորաբաժանումների հետ, իսկ առաջարկվող իրավական ակտերում արտացոլել նաեւ տեխնոլոգիական նոր հնարավորություններով պայմանավորված մոտեցումները:
Կոլեգիայի քննարկմանը ներկայացված մյուս փաստաթուղթը «Հայաստանում տեղական ինքնակառավարման մարմինների տեղեկատվայնացման եւ տեղական տեղեկատվական հասարակության զարգացման քաղաքականությունը» hայեցակարգի նախագիծն էր: Փաստաթղթի նպատակը ՏԻՄ-երի գործունեության թափանցիկության ու հաշվետվողականության ապահովումն է: Այն մշակվել է «Տեղեկատվական համակարգերի զարգացման եւ վերապատրաստման կենտրոն» ՀԿ-ի կողմից` «Բաց հասարակության հիմնադրամներ – Հայաստան» հիմնադրամի օժանդակությամբ:
Նախագծում նկարագրված է Հայաստանում ՏԻՄ-երի տեղեկատվայնացման եւ համայնքներում տեղեկատվական հասարակության ձեւավորման hետ կապված ներկա իրավիճակը, ներկայացված են կատարված հետազոտությունների արդյունքում բացահայտված հիմնական խնդիրները եւ վերլուծություններից բխող եզրահանգումների հիման վրա ձեւավորված առաջարկությունները:
Փոխվարչապետը հանձնարարել է մինչ կառավարություն ներկայացնելը լրամշակել նախագիծը: Քննարկված փաստաթղթերը կոլեգիան ընդունել է ի գիտություն:
