նախընտրելի դարձնել
Երեւանի Հյուսիսային պողոտայում «Հայաստանի պատանեկան նվաճումներ» կազմակերպությունը, հոկտեմբերի 19-ին, կիրականացնի «Աշակերտական գործարար ընկերությունների տոնավաճառ» միջոցառումը: Այն կազմակերպվում է ԱՄՆ Միջազգային զարգացման գործակալության ֆինանսավորմամբ իրականացվող «Ձեռնարկատիրական եւ քաղաքացիական կրթությունն ավագ դպրոցի աշակերտների համար» ծրագրի շրջանակներում:
Տոնավաճառին կմասնակցեն եւ իրենց արտադրանքները սպառողներին կներկայացնեն հանրապետության ավելի քան 40 ավագ դպրոցների լավագույն աշակերտական ընկերությունների ներկայացուցիչներ Երեւանից եւ հանրապետության բոլոր մարզերից:
Տոնավաճառը կրթական ծրագիր է, որի շնորհիվ աշակերտները հնարավորություն են ունենում իրենց գործարար ընկերությունների արտադրանքները ներկայացնել սպառողներին եւ ցուցադրել այն ձեռներեցական հմտությունները եւ գիտելիքները, որոնք ձեռք են բերվել ուսումնառության ընթացքում:
«Հայաստանի պատանեկան նվաճումներ» կազմակերպության կողմից իրականացվող եւ ԱՄՆՄԶԳ-ի կողմից հովանավորվող «Ձեռնարկատիրական եւ քաղաքացիական կրթությունն ավագ դպրոցի աշակերտների համար» ծրագրի նպատակը աշակերտներին կայուն եւ հարուստ տնտեսագիտական գիտելիքներով ապահովելն է: Այն նպաստում է աշակերտների ձեռնարկատիրական եւ գործարար հմտությունների զարգացմանը: Ծրագիրը հատուկ ուշադրություն է դարձնում գործարարության պրակտիկ ուսուցմանը: Ծրագրի շրջանակներում աշակերտները հիմնում են գործարար ընկերություններ, կատարում են շուկայական հետազոտություն, գրում են բիզնես-պլան, թողարկում եւ վաճառում են ընկերության բաժնետոմսերը եւ կազմակերպում են ապրանքի կամ ծառայության արտադրությունը: Այդ ընթացքում աշակերտները ծանոթանում են նաեւ կորպորատիվ սոցիալական պատասխանատվության հիմնական սկզբունքներին: Ծրագրի շնորհիվ աշակերտները վարժվում են թիմային աշխատանքին եւ դառնում առավել ինքնավստահ:
Տոնավաճառից գոյացած դրամական միջոցների մի մասը աշակերտները ձեռնարկատիրական եւ կորպորատիվ սոցիալական պատասխանատվության կրթական ծրագրի շրջանակներում ուղղելու են տարբեր բարեգործական ձեռնարկների իրականացմանը:
