Թունիսի վարչապետ Ալի Լարայեդը հայտարարել է, որ իր գլխավորած կառավարությունը պատրաստ է հրաժարական տալ, սակայն  ժամանակավոր կառավարության ձեւավորման վերաբերյալ բանակցությունների ավարտից հետո:

Լարայեդը հիշեցրել է, որ պայմանավորվածություն կա ընդդիմության եւ կառավարական իսլամիստների միջեւ, ըստ որի` կողմերը պարտավորվում են ավարտել նոր սահմանդրության նախապատրաստման գործընթացը եւ համընդհանուր ընտրությունների ամսաթիվ նշանակել:  Լարայեդն ընդգծել է, որ այդ համաձայնության պայմանները կատարելուց անմիջապես հետո իր գլխավորած կառավարությունը հրաժարական կտա, հայտնում է «lenta.ru»-ն` վկայակոչելով Reuters-ը:

Հոկտեմբերի 23-ին Թունիսի ժողովուրդը դուրս էր եկել մայրաքաղաքի, ինչպես նաեւ երկրի կենտրոնական հատվածում գտնվող Սիդի Բուզիդ քաղաքի փողոցներ` կառավարության դեմ կոչեր բղավելով եւ պահանջելով իշխող  «Ան Նահդա» իսլամական կուսակցության հրաժարականը: Ոստիկանների եւ ցուցարարների բախումների հետեւանքով  զոհվել էր ինը մարդ, հայտնում է Al-Arabiya-ն:

Բախումների պատճառ էր դարձել  Թունիսի Ազգային գվարդիայի  աշխատակիցների այն տան վրա հարձակվելու փորձը, որտեղ թաքնվում էին զինված ծայրահեղականները: Հակամարտության հետեւանքով զոհվել էր յոթ ոստիկան եւ երկու գրոհային, հայտնում է NEWSru.com-ը: