Այսօրվա իրականությունը կարող է հաղթահարվել միայն ապստամբ գիտակցությամբ. Ապստամբ գիտակցությունն է, որ  մերժում է անմիտ լռությունը: Այս մասին «Խորհրդարանական շաբաթ» հաղորդման շրջանակում իր ելույթում հայտարարել է «Ժառանգություն» խմբակցության ղեկավար Զարուհի Փոստանջյանը:

Նա մասնավորապես ասել է.

«Երբ մեր պատմական հայրենիքում, մեր պետության մեջ մեզ վերաբերվում են որպես օտարի, եւ մենք անմիտ լռում ենք եւ երբեմն փորձ ենք կատարում արդարացնել օտարամոլությունը, ուրվագծվում է հայկական պետականության կորստի տեսլականը:

Մեր ժողովուրդը կրկին ապրում է մի շրջան, երբ նրան զանգվածաբար տեղահանում են իր պատմական հայրենիքից, իսկ մնացողներին ամեն կերպ նվաստացնելով` փորձում ոչնչացնել նրանց ոգին: Այս հանցագործությունները կատարվում են առանց քողարկման, մեր բոլորիս ներկայությամբ:

Սերժ Սարգսյանը եւ նրա խմբավորման անդամները, ցանկանալով երկարացնել բռնազավթման ժամկետը, Մաքսային միության անդամակցության հայտարարությամբ  փորձ են կատարում վաճառքի առարկա դարձնել երկու հայկական պետությունների ինքնիշխանությունը:

Իհարկե, ոչ Սերժ Սարգսյանին, ոչ էլ այլ բռնազավթչի չի հաջողվելու մեզանից օտարել մեր անգին Անկախությունը: Մեր երկրի հազարամյակների պատմության մեջ վերջին 20 տարվա ընթացքում վերականգնած երկու պետությունների ինքնիշխանությունը մենք թույլ չենք տալու որեւէ ապօրինի իշխանությանը հանձնել որեւէ այլ պետությանը կամ վերպետական միավորմանը:

Այսօրվա իրականությունը կարող է հաղթահարվել միայն ապստամբ գիտակցությամբ: Ապստամբ գիտակցությունն է, որ  մերժում է անմիտ լռությունը:

Բոլորս ականատեսն ենք եւ հասկանում ենք  այս անհեթեթությունը, անիմաստությունը եւ անարդարությունը, բայց մեր մեջ չենք գեներացնում խռովությունը:

Մեր ուղեղներին  անհապաղ անհրաժեշտ է խռովություն: Խռովությունն է, որ մարտահրավեր է նետում  անհեթեթությանը, անիմաստությանն ու անարդարությանը:

Խռովությունն է, որ կարող է միաժամանակ ցանկանալ եւ պահանջել` դադարեցնելու խայտառակ վիճակը:

Մեր խռովության  նպատակն է ամրագրել Հայ ազգի շահերին համահունչ փոփոխությունը:

Ուրեմն, հանուն տապալված սահմանադրական կարգի վերականգնման ընդդեմ բռնազավթիչների՝  խռովության հրահրում համատարած եւ ամենուր»:

Լուսանկարը՝  Արսեն Սարգսյանի/NEWS.am