ԱՄՆ-ի նախագահ Բարաք Օբամայի պաշտոնավարման ամբողջ ընթացքում Associated Press-ի լուսանկարիչները միայն երկու անգամ են հնարավորություն ստացել նախագահին լուսանկարել Սպիտակ տան իր աշխատասենյակում: Ընդ որում` երկու անգամն էլ եղել է նախագահական առաջին ժամկետում:

Նման հայտարարությամբ հանդես է եկել AP-ի ֆոտոծառայության ղեկավար Սանտյագո  Լիոնը` Ինդիանապոլիսում AP Media Editors կոնֆերանսի ընթացքում, հայտնում է lenta.ru-ն` վկայակոչելով The Daily Caller-ը:

Տեղեկատվական գործակալությունների լուսանկարիչները Սպիտակ տուն ազատ մտնում են միայն այլ պետությունների ղեկավարների հետ Օբամայի հանդիպումների ժամանակ, այնինչ զուտ   Օբամայի կամ նրա աշխատակազմի գործունեության լուսաբանման համար Սպիտակ  տունը գերադասում է իր լուսանկարիչների կողմից արված նկարները տարածել:

Սա հակասում է Օբամայի այն հայտարարությանը, թե ինքը ցանկանում է  իր աշխատակազմի գործունեությունը պատմության մեջ ամենաթափանցիկը դարձնել, նշել է Լիոնը:

AP-ի ղեկավարությունը խմբագիրներին կոչ է արել չհրապարակել Սպիտակ տան տրամադրած լուսանկարները: