30 օր առաջ Ավան գյուղում առեղծվածային պայմաններում անհետացած 47-ամյա Յուրա Մարտիրոսյանին որոնելու համար Պաշտպանության նախարարությունը ուղղաթիռ է տրամադրել: Այս մասին NEWS.am-ի թղթակցի հետ զրույցում ասաց Ավանի գյուղապետ Գեւորգ Գալստյանը: «Երկու ժամ շարունակ մեր եւ հարեւան գյուղի տարածքում փնտրեցինք, բայց ապարդյուն: Ես էլ նրանց հետ: Սակայն որոնողական աշխատանքները շարունակվում են»,- պատմեց գյուղապետը:

Հարցին, թե ի՞նչ վարկածներ կան, նա պատասխանեց. «Հիմա ցանկացած տարբերակ կարող է սխալ լինի, կարող է՝ ճիշտ: Շարունակում ենք մնալ այն վարկածին, որ վախից հիշողությունը կորցրել է եւ մի ուրիշ տեղ է գնացել»,- նշեց գյուղապետը:

Ավելի վաղ տեղեկացրել էինք, որ Արագածոտնի մարզի Ավան գյուղի բնակիչ, 47-ամյա Յուրա Մարտիրոսյանը հոկտեմբերի 5-ից առեղծվածային պայմաններում անհետացել է: Այս մասին NEWS.am-ի թղթակցի հետ զրույցում ասել էր Ավան գյուղի գյուղապետ Գեւորգ Գալստյանը: Նա պատմեց, որ իրենց գյուղի բնակիչները անասունները հերթափոխով են պահում: Հոկտեմբերի 5-ի երեկոյան, ժամը 18-ի սահմաններում, երբ Յուրան վերադարձել է իր հերթից պարզվել է, որ մի քանի անասուն չի եկել: Գյուղացիներն էլ հավելել էին, որ կորած անասունների տերը եկել եւ ասել է, թե իրեն չի հետաքրքրում թող գնա, իր անասունը գտնի բերի: «Յուրան գնացել է ու էն գնալն է, որ գնացել է»,- նշել էին գյուղացիները:

Գյուղապետը նաեւ ավելացրել էր, որ Յուրայի մայրը գլխի է ընկել, որ տղան վտանգի մեջ է եւ խնդրել է համագյուղացիներին գնալ փնտրել: Համագյուղացիները գնացել են փնտրելու, բայց չեն գտել: Մինչեւ այսօր, թե համագյուղացիները, թե ոստիկանությունը, թե ԱԻՆ-ը փնտրում են, բայց ապարդյուն: Այնինչ` կորած անասունները հենց նույն գիշեր վերադարձել են: Գյուղապետը բացառել է, որ տղամարդուն կարող էին գայլերը կամ արջերը վնասած լինեն. «Այդ վարկածները ստուգվել են, եթե գայլ, արջ վնասած լինեին, ինչ-որ հետք կթողնեին: Նրա ձեռքին փայտ եւ մարտկոց է եղել, բայց դրանք էլ չեն գտնվել: Հագուստից էլ լաթի կտոր էլ չեն գտել: Միակ վարկածը նա է, որ վախից մի բան կատարվել է հետը եւ անհայտ ուղղությամբ է գնացել: Հարազատները հուսով սպասում են, որ հայրը ողջ առողջ վերադառնա տուն»: Անհետացած տղամարդը 18 տարեկան մի տղա ունի, որը պետք է բանակ զորակոչվի: Նա ապրում է տղայի, կնոջ եւ մոր հետ: