Հայաստանի բնապահպանության նախարարության՝ հոկտեմբերի 28-ից նոյեմբերի 2-ն ընկած ժամանակահատվածում իրականացրած ստուգումների, շրջայցերի գործընթացում հայտնաբերված խախտումների քննության արդյունքում կայացվել է 580 հազար դրամ ընդհանուր գումարի վարչական տուգանքի 9 որոշում եւ հաշվարկվել է 309 հազար դրամ  շրջակա միջավայրին հասցված վնաս:

Տավուշի տարածքային ստորաբաժանման վարույթին հանձնած ապօրինի ծառահատման երեք գործի քննության արդյունքում կայացվել է 150 հազար դրամ ընդհանուր գումարի վարչական տուգանքի երեք որոշում:

Սյունիքի տարածքային ստորաբաժանման վարույթին հանձնած մեկ անտառխախտման արձանագրության հիման վրա հաշվարկվել է 309 հազար դրամ գումարի շրջակա միջավայրին հասցված վնաս:

Շիրակի տարածքային բաժնի աշխատակիցների շրջայցերի ընթացքում հայտնաբերած ապօրինի որսի մեկ դեպքի համար ֆիզիկական անձի նկատմամբ կայացվել է 50 հազար դրամ գումարի վարչական տուգանքի որոշում: Առգրավվել է երեք խեցգետնաորսիչ եւ 2.5 կգ խեցգետին: Բռնագրավված խեցգետինը բաժնի աշխատակիցները, համապատասխան  արձանագրությունները կազմելուց հետո, կենդանի վիճակում բաց են թողել ջրամբար:

Ջրերի վերահսկողության բաժնի աշխատակիցների կողմից  Արարարատյան դաշտավայրում հայտնաբերված երեք խախտման համար տրվել է` խորքային հորերի վրա փականային ռեժիմով ջրառի դադարեցման երեք որոշում, ինչպես նաեւ կայացվել է 80 հազար դրամ գումարի վարչական տուգանքի մեկ որոշում:

Հաշվետվությունները սահմանված ժամկետում չներկայացնելու համար Շիրակի տարածքային ստորաբաժանումը երկու տնտեսվարողի նկատմամբ կայացրել է 100 հազար դրամ ընդհանուր գումարի վարչական տուգանքի երկու որոշում:

Տավուշի տարածքային բաժնի վարույթին հանձնած փայտանյութի ապօրինի տեղափոխման երկու դեպքի  համար կայացվել է  200 հազար դրամ ընդհանուր գումարի  վարչական տուգանքի երկու որոշում:

Ընդհանուր առմամբ՝ այդ ժամանակահատվածում, ՀՀ բնապահպանության նախարարության կիրառած պատժամիջոցներից  պետական բյուջե մուտք է եղել 2.61 մլն դրամ գումար: