Ուկրաինայի Գերագույն ռադան հավանություն չի տվել նախկին վարչապետ Յուլիա Տիմոշենկոյին բուժման համար արտասահման ուղարկելու մասին օրակարգում ներառված   6 օրինագծերից  որեւէ մեկին: Օրինագծերից ոչ մեկը  195-ից ավելի ձայն չի ստացել, քանի որ Ռեգիոնների կուսակցության եւ Ուկրաինայի Կոմկուսի խմբակցությունները չեն մասնակցել  քվեարկությանը, հայտնում է «Ինտերֆաքս-Ուկրաինան»:

Դահլիճում ներկա են եղել դիտորդներ Եվրախորհրդարանից` ԵԽ-ի նախկին նախագահ Պետ Քոքսը եւ Լեհաստանի նախկին նախագահ Ալեքսանդր Կսանիեւսկին: Քվեարկության ավարտին ընդդիմադիրները ելել են տեղերից եւ աղաղակել. «Ամոթ, ամոթ»:

Նոյեմբերի 21-ին Ուկրաինայի Գերագույն Ռադան ընդունել էր եվրաինտեգրման օրենքներից մեկը` ժողովրդական պատգամավորների ընտրության օրենսդրության մեջ փոփոխություններ կատարելու մասին:

Օրենքին կողմ էին քվեարկել նիստերի դահլիճում գրանցված 423  ժողորդական պատգամավորներից 365-ը: Քվեարկությանը չէր մասնակցել  Ուկրաինայի Կոմկուսի խմբակցությունը:

Ժողովրդական պատգամավորների ընտրության օրենսդրության մեջ փոփոխություններ կատարելու մասին  եվրաինտեգրման օրենքը, որն առաջարկել էին Ռեգիոնների կուսակցության ժողորդական պատգամավորները, նախատեսում է ընտրատարածքների ստեղծում արտերկրում, մարզային ընտրահանձնաժողովների ձեւավորման գործընթացների փոփոխություններ, գրանցման ժամանակ վճարվող գումարի չափի նվազեցում, ինչպես նաեւ խստացված պահանջներ` ընտրությունները լուսաբանող տեղեկատվական գործակալությունների նկատմամբ:

Յուլյա Տիմոշենկոյի վերաբերյալ որոշումն անհրաժեշտ էր Ուկրաինայի եւ ԵՄ-ի միջեւ նոյեմբերի 28-29-ին Վիլնյուսում ասոցացման պայմանագիր ստորագրելու ուղղությամբ Եվրամիության դրական որոշման համար: