Աբովյան քաղաքում այսօր` նոյեմբերի 30-ին  բազմաթիվ առեւտրականներ ցանկացել են հանդիպել  Կոտայքի հարկային տեսչության պետ  Վահագն Սահակյանին, սակայն նա չի ընդունել բողոքի դուրս եկած առեւտրականներին:  Այս մասին NEWS.am-ին փոխանցեցին առեւտրականները: 

Նրանք դժգոհում են, որ հարկային տեսչությունը իրենց տեռորի է ենթարկում եւ իրենք չեն կարողանում  արհեստական հարկերի տակից դուրս գալ: Իսկ, երբ առեւտրականները ցանկացել են ներս մտնել աշխատասենյակ, հարկայինի պետը դիմել է ոստիկանների օգնությանը եւ առեւտրականներին դուրս են հանել աշխատասենյակից:

Առեւտրականները փոխանցեցին, որ  դրանով ոչինչ չի ավարտվում, քանի որ իրենք դեռ նոր են սկսել իրենց պայքարը եւ թույլ չեն տալու, որ հարկային չհիմնավորված քաղաքականությամբ ծակեն իրենց  գրպանները: «Բոլորը ռեկետ են դարձել: Այսօր այս ժողովուրդը ռեկետի զոհ է դարձել կամ պետք է մեր իրավունքներին տեր կանգնենք կամ վերջում մենք էլ համալրենք սովածների շարքերը»,- նշեցին առեւտրականները եւ ավելացրեցին, որ փորձելու են հանդիպել նաեւ ԲՀԿ նախագահ Գագիկ Ծառուկյանին: