նախընտրելի դարձնել
Ավելի քան 2300 տարի անց Օտագոյի համալսարանի գիտնականներից մեկին, միգուցե, հաջողվել է բացահայտել Ալեքսանդր Մակեդոնացու հանելուկային մահվան գաղտնիքը:
Թունաբան Լեւ Շեպը կարծում է, որ Ալեքսանդրին կարող էին թունավորել: Թույնը, ըստ նրա, գինու մեջ է լցվել, այն պատրաստված է եղել առաջին հայացքից անվնաս բույսից, գրում է Mail Online-ն իր նոր համարում: Շեպը, որը տասնյակ տարիներ թունաբանական տվյալներ է ուսումնասիրում, ասում է, որ թունավորման տեսություններից մի քանիսը ճշմարտանման չեն, օրինակ՝ մկնդեղով կամ ստրիխնինով թունավորելը: Նրա կարծիքով՝ եթե այդ թույներն օգտագործվեին, մահը շատ արագ վրա կհասներ, փոխանցում է Fedpost.ru-ն:
Ըստ Շեպի ուսումնասիրության՝ զորավարի մահվան պատճառը սպիտակ ղանձլամերն է եղել:
Բույսի սպիտակ ծաղիկները, որոնք կարող էին ավելացվել գինու մեջ, քաջ հայտնի էին հին հույներին եւ գործածվում էին դեղագործների կողմից:
Կարեւոր է նշել, որ նման թույնը կարող էր տեւական եւ տանջալի մահվան պատճառ դառնալ: Հայտնի է, որ Ալեքսանդրը մահացել է 12 օրվա ընթացքում: Նա նախ խոսելու ունակությունն է կորցրել, հետո՝ շարժվելու: Մնացած ենթադրյալ թույները ամենայն հավանականությամբ նրան անմիջապես կսպանեին:
Շեպի տեսության համաձայն՝ սպիտակ ղանձլամերը գինուն ավելացվել է խմորման գործընթացում, այնուհետեւ տվյալ գինին մատուցվել է զորավարին: Նման գինին չափազանց դառը համ պետք է ունենար, սակայն այն կարելի էր քաղցրացնել, եւ Ալեքսանդրը, որը, ըստ երեւույթին, հարբած էր լինում, ոչինչ էլ չէր նկատի:
