Հայաստանի տնտեսական մրցակցության պաշտպանության հանձնաժողովն այսօր կայացած նիստում որոշում է կայացրել չտուգանել «ԱրմենՏել» ընկերությանը, որի դեմ հայց էր ներկայացրել «Ռոստելեկոմ» ընկերությունը:

Վերջինս նշել էր, թե իր ծայությունների աշխարհագրությունը ընդլայնելու եւ բաժանորդներին ինտերնետ կապ  տրամադրելու նպատակով անհրաժեշտ է վարձակալել  «ԱրմենՏել» ընկերությանը պատկանող որոշ ենթակառուցվածքներ: «Ռոստելեկոմը» տեղեկացրել էր նաեւ, որ  օրենսդրության պահանջին համապատասխան կատարել է  բոլոր վճարումները: Սակայն «ԱրմենՏելը» «Ռոստելեկոմին» ներկայացրել է պայմանագիր, որտեղ բացի օրենսդրությամբ սահմանված վարձակալական գումարից, ներառված են եղել նաեւ լրացուցիչ այլ վճարներ, որոնք տարեկան հաշվով կազմում են մոտ 1 մլն 720 հազար դրամ: ՏՄՊՊՀ-ն փաստել է, որ «Ռոստելեկոմը» չի կարող այդ ծառայությունները ստանալ մեկ այլ ընկերությունից, քանի որ նման ենթակառուցվածքներ ունի միայն  «ԱրմենՏելը»:  

Նիստի ընթացքում «Ռոստելեկոմի» տնօրեն Հայկ Ֆահրամազյանը տեղեկացրել է, որ հանձնաժողովի միջամտության արդյունքում խնդիրը արդեն իսկ կարգավորվել է եւ առանց լրացուցիչ պայմանների եւ վճարների պարտադրման, «ԱրմենՏելը» կնքել է պայմանագիրը: