նախընտրելի դարձնել
Ցավոք, Հայաստանի եւ Իրանի միջեւ ստորագրված երկկողմ համագործակցության փաստաթղթերի պահանջների կատարման բնագավառում դեռեւս մեծ են չօգտագործված հնարավորություններ: Այս մասին, այսօր՝ հունիսի 12-ին, Հայաստանում Իրանի դեսպան Մոհամմադ Ռեյիսիի հետ հանդիպման ժամանակ հայտարարել է Հայաստանի գյուղատնտեսության նախարար Սերգո Կարապետյանը:
Նա հույս է հայտնել դեսպանի աջակցությամբ հնարավորինս ակտիվացնել ձեռք բերված պայմանավորվածությունների իրականացումը: Որպես առաջին քայլ՝ նախարարն անդրադարձել է Հայաստանում «Հալալ» մակնշմամբ սպանդանոցների շահագործումն արագացնելու խնդրին:
Շնորհակալություն հայտնելով ջերմ ընդունելության եւ ներկայացված տեղեկատվության համար` դեսպանը պատրաստակամություն է հայտնել հետեւողականորեն շարունակել նախկինում ձեռք բերված պայմանավորվածությունների իրականացմանն աջակցելը եւ նպաստել երկկողմ համագործակցության հետագա խորացմանը:
Նախարարը դեսպանին տեղեկացրել է նաեւ Իրանի գյուղատնտեսության նախարարին այս տարի աշնանը Հայաստան հրավիրելու մտադրության մասին, որը հնարավորություն կընձեռի առավել մանրամասն քննարկել առաջիկա անելիքները եւ հստակ մոտեցումներ ցուցաբերել կոնկրետ ծրագրերի իրականացման ուղղությամբ:
Ի պատասխան իրանցի գործարարների կողմից Հայաստանում եգիպտացորենի արտադրությամբ զբաղվելու հետաքրքրություն ունենալու մասին պարոն Ռեյիսիի բարձրացրած հարցի, նախարարը պատրաստակամություն է հայտնել աջակցելու նման նախաձեռնություն ունեցող իրանցի բոլոր գործարարներին:
Այնուհետեւ նախարարն առաջարկեց իրանական կողմին քննարկել նաեւ իրանական ներդրումներով Հայաստանում կաթիլային ոռոգման սարքավորումների, կարկտապաշտպան ցանցերի արտադրություն կազմակերպելու հարցը:
