Իրանի մայրաքաղաքում սկսվել են Իրանի եւ Գերմանիայի երկկողմ խորհրդակցությունները Թեհրանի միջուկային ծրագրի շուրջ՝ «վեցյակի» Վիենայում կայանալիք հերթական բանակցություններին ընդառաջ։

ԻՐՆԱ-ն հայտնում է, որ գերմանական պատվիրակությունը, ԱԳՆ-ի քաղաքական տնօրենՀանս-Դիտեր Լուկասի գլխավորությամբ,  հանդիպել է ԻԻՀ նախագահի արտաքին քաղաքական հարցերով  խորհրդական Ալի Աքբար Վելայատիի հետ։  Հանդիպումներ են նախատեսված նաեւ Իրանի փոխարտգործնախարարներ Մաջիդ Թահթ Ռավանչիի եւ Աբաս Արաքչիիի հետ, փոխանցում է ԻՏԱՌ-ՏԱՍՍ-ը։

Թեհրանի եւ Բեռլինի բանակցություններն անցկացվում են երկկողմ խորհրդակցությունների շարքի շրջանակում, որոնց ընթացքում կողմերը հստակեցնում են դիրքորոշումները եւ ձգտում հարթել տարաձայնությունները՝ հունիսի 16-20-ին Վիեննայում «վեցյակի» (ՄԱԿ-ի ԱԽ մշտական հինգ անդամները, գումարած Գերմանիան) եւ Իրանի միջեւ սպասվող բանակցություններին ընդառաջ։