Նախընտրելի
67 ընտանիքների «Զվարթնոց» օդանավակայանի հարակից տարածքի բազմահարկերից կտեղափոխեն Երեւանի նորակառույցներ: Հունիսի 14-ին շինարարությունը ղեկավարող Գաբրիել Արաբյանը լրագրողներին ասաց, որ Երեւանի Հարավարեւմտյան թաղամասում՝ օդանավակայանի ճանապարհին կառուցված շենքերը պատրաստ են բնակեցման:
Յուրաքանչյուր ընտանիքի համար բնակմակերեսը 10%-ով ավելին է ներկայիս ունեցածից: Վերաբնակեցումը կսկսվի հուլիսի 1-ից:
Վերաբնակեցման երկրորդ փուլը նախատեսված է դեկտեմբերին. եւս 97 ընտանիքներ կտեղափոխվեն: Նրանց մի մասը բազմահարկերում են ապրում, մնացածի վիճակը ծայրահեղ է. մի քանի տասնյակ ընտանիքներ հանրակացարանի սենյակներում են ապրում՝ 3-5 հոգով 13,5քմ-ում:
Այդ ընտանիքները կստանան 40- 64 քմ մակերեսով բնակարաններ: Բացի դրանից, օդանավակայանի աշխատակիցները կապահովվեն անվճար տրանսպորտով՝ տնից աշխատանքի վայր եւ հետադարձ ուղղությամբ:
6 նոր շենքեն ունեն ջեռուցում եւ միացված է անհրաժեշտ ողջ ենթակառույցը, այդ թվում նաեւ՝ ինտերնետը: Շենքերն ունեն ջրի բաքեր:
Նշենք, որ նոր շենքերի կառուցումն ընդգրկված է եղել ՀՀ կառավարության եւ Արգենտինայի «Արմենիա միջազգային օդանավակայաններ» ընկերության միջեւ կնքված կոնցեսիոն պայմանագրում, որը կառավարում է Երեւանի «Զվարթնոց» օդանավակայանը 2002 թ.-ից: Հին շենքերը կքանդվեն վերաբնակեցումից հետո:
Նախագիծն իրականացվում է Վերանորոգման եւ զարգացման եվրոպական բանկի, Ասիական զարգացման բանկի եւ Գերմանիայի DEG բանկի աջակցությամբ: Շինարարության համար ներդրվել էր 13 միլիոն դոլար:
